Gibayaw Si Jesus Didto Sa Langit

LUCAS 24: 50~53

50 Ug gidala sila ni Jesus duol sa Betania. Miisa siya sa kamot ug mipanalangin. 51 Samtang nanalangin, mibiya si Jesus; gibayaw sa langit. Ug misimba sila 52 unya, namalik sa Jerusalem nga puno sa kalipay; 53 kanunayng didto sa templo, naghimaya sa Diyos.

PAGPAAMBIT SAMENSAHE:

Ang maong ebanghelyo maoy pagpasabot lamang usab diha sa ubang sinulat nga nagaingon: Buhat 1:11 “ Mga Taga Galilea nganong nagbarog man kamo dinhi ug nagsigeg hangad sa langit. Si Jesus nga gibayaw ngadto sa langit mobalik sa samang paagi sa iyang pagkayab ngadto sa langit.” Diin mao kini ang unod sa maong ebanghelyo kun giunsa siya pagbayaw nan mao usab unya kana ang iyang pagbalik diin maabli ang langit ug ihatod siya sa mga manulunda ug nagaawit sa mga awit sa pagdayeg.

Diha sa ubang sinulat nagaingon ( 2 Pedro 3 :9 )" Ang Ginoo dili maglangan sa iyang gisaad sumala sa gihuna-huna sa uban. Apan siya nagapailob kaninyo kay dili siya buot nga may isa nga malaglag kundili nga ang tanan nga maghinulsol ug mobiya sa ilang mga sala". Sa ato pa mag igsoon ang pagbalik ni Jesus Cristo alang sa kataposang paghukom mahitabo lamang kun naandam na ang iyang mga tinawag ug mga pinili nga katawhan .

Ang pangutanan niinig panahuna mao nga…Naandam naba ang mga tinawag ug pinili nga katawhan , kun karong Alas dose sa gabii mobalik ang Ginoo nasiguro ba nato ang atong kaluwasan diha sa kinabuhing dayun? Andam naba kita? Wala gayud kanato makasiguro mga oigsoon sama nga wala kanato makasiguro sa tukmang takna ug oras sa iyang pagbalik, apan ang mga ilhanan ania na. Diin diha niining balaang kasulatan nga matuod nga mga pulong sa Diyos ginaingon nga 90 % na niining mga panagna nga ania dinhi sa balaang kasulatan ang natuman na diin ania na kita sa Pinadayag nga bahin diin nagkalain-laing katalagman ang gipasinati.

Busa ang Diyos miingon ngadto sa iyang mga ginahasan nga kaniadto sa bag-o pa kamo niining maong pagtulon-an sama kamo niining mga dumoduong mga dasig kaayo apan karon kumpiyansa na kaayo ug miingon siya nga ayaw kamo pagpalabi ug kumpiyansa , Ayaw ninyo hulata nga ang katalagman anaa na sa inyong atubangan ayha pa kamo manguros. Dako ug mahimo ang mga paghalad ug mga pag-ampo diha sa luhod ug dupa ingon man sa hapa dupa nga mga pag-ampo kay matod pa ang mag pag-ampo nga adunay uban nga sakripisyo nan dali gayud dunggon sa Diyos sama nga ang hinugpong nga pag-ampo sa mga katawhan dinhi sa sinagoga diha sa pagtukaw ug sa mga balaang oras nan madungog kini hangtod didto sa iyang gingharian sa langit.

Sa kanunay atong tuki-on ang atong kaugalingon kun asa na kita nahiabot diha niining pagtulon-an nga atong gibarugan aduna bay kausaban ang atong mga hiyas kaniadto ug karon, atong bang nasul-ob sa hingpit ang kinaiyahan ni Jesu-Cristo nga maoy atong Diyos ug manunubos, kay kun moingon ka nga nagasunod ka niining maong pagtulon-an ug nagasunod ka sa mga gisangyaw ni Jesu Cristo apan nagdumot ka ug adunay pa kasuko diha sa imong kasing-kasing nan wala pa kapa magpuyo sa kahayag kundili anaa ka pa sa kangitngit. Ang Diyos miingon nga bakakon ang tawo nga nagaingon nga nahigugma sa Diyos apan nagdumot sa iyang isigkatawo , sa iyang silingan ug mga kauban sa buhat, kay giunsa man nimo pahigugma ang Diyos nga wala nimo makita ug mahikap apan gidumtan nimo ang imong isigkatawo nga sa tanang adlaw imong makita ug imong makaptan, nan ang Diyos miingon bakakon ka… wala ka mahigugma sa Diyos kundili ang imo lamang garbo ang imong gipalabi.

Mga igsoon ihapa ug iluhod ang imong mga daang hiyas aron matangttang sa hinay-hinay diha sa mga espesyal nga paghalad kay matod pa sa balaang bata ang santos nga rosaryo sa kaadlawon alang kana sa imong proteksyon sa tibuok adlaw ug ang santos rosaryo sa kagabhion alang kana sa imong proteksyon sa imong pagkatulog ug sa imong espiritu, nan ang mga hiyas nga wala mauyoni sa Diyos hatagi ug espesyal nga oras sa pag-ampo, diha sa hinay-hinay ug kanunay nga mga paghalad.

Matod pa diha sa mga hinapon nga paglambo sa ilang kina-iyahan duna sila gitawag sa hinapon nga nagkanayon “ Masakatsu Agatsu” sa ato “Your greatest Victory is if You win over yourself” Ang imong daka kuno nag kadaugan dinhi sa ibabaw sa kalibutan mahimo lamang kun ikaw modaug batok sa imong kaugalingon, Nga kun atong hubaron sa espirithanon nga pagkahubad Ang imong daku nag kadaugan dili diha as imong kadaugan diha sa imong isigkatawo kundili batok sa imong kaugalingon ug mahitabo lamang kini kun ipaubos mo ug ,tumban nimo ang imong garbo ug maoy imong ipahari si Jesu Cristo diha sa imong kasing-kasing,sa ato pa ang imong dakong kadaugan mao nga madaug nimo ang tanan nga pagsulay sa imong kinabuhi kun imong ipahari ang hiyas sa espiritu santo diha sa imong kasing-kasing.