Kaguol Mahimong Kalipay

JUAN 16:16~24

• 16 Sa dili madugay dili na mo makakita nako; unya, sa dili na pod madugay, makita na ko ninyo.” 17 Ang ubang tinun-an natingala, unsay kahulogan sa iyang gisulti: ‘Sa dili madugay, dili na mo makakita nako, ug sa dili madugay makita na ko ninyo. Nganong miingon man siya: ‘Moadto ko sa Amahan?’ 18 Miingon sila sa usag usa: “Unsa ning sa dili madugay?’ Dili masabot.”

19 Nakamatikod si Jesus nga buot silang mangutana busa, miingon siya: “Naglibog mo tungod sa akong gisulti nga sa dili madugay dili na mo makakita nako unya, sa dili pod madugay makita na ko ninyo. 20 Sa pagkatinuod sultihan tamo, maghilak mo ug magbangotan samtang naghudyaka ang kalibotan. Maguol mo, apan mahimong kalipay ang inyong kaguol.

21 Ang babayeng mabdos maguol kon hapit na manganak. Apan inigkatawo sa bata, dili na siya mahinumdom sa pag-antos tungod sa kalipay: Nahimugso ang usa ka tawo sa kalibotan. 22 Naguol mo karon, apan makita ra ko ninyo pag-usab ug maglipay ang inyong kasingkasing sa ingon nga wala nay makaagaw sa inyong kalipay. 23 Anang adlawa, dili mo mangayo nako. Sa pagkatinuod sultihan tamo, bisag unsay inyong pangayoon sa Amahan sa akong ngalan, iyang ihatag. 24 Hangtod karon wala pa mo makapangayo sa akong ngalan. Busa, pangayo ug makadawat mo aron mahingpit ang inyong kalipay.

PAGPAAMBIT SA MENSAHE:

Ang maong ebanghelyo maoy pagpasabot lamang diha sa mga pagtulon-an nga gisangyaw ni Jesu Cristo diin sa dihang hapit na siya mobalik ngadto sa gingharian sa iyang Amahan siya nagpasidaan nga diha sa iya unyang paglakaw bati-on ug kaguol ang iyang mga tinun-an apan malipay ra gihapon sila inigkadayag na sa kamatuoran. Kini nagapasabot lamang nga sa kamatayon unya sa atong manunubos diin siya pagalutoson ug ilansang sa krus nan magbangutan ang iyang mag tinun-an, apan unya diha sa iyang pagkabanhaw malipay sila kay gipamatuod sa Diyos nga kamatuoran ang iyang gisangyaw ang kamatuoran ug sa ingon kamatuoran nga adunay pagkabanhaw human sa kamatayon diin mao kini ang gipasinati kanila.

Diha sa Juan 14: 15 nagaingon si Jesu Cristo “ Tumana ninyo ang akong mga sugo kay mangayo ako sa Amahan ug tagaan kamo niya ug laing manlalaban, ang espiritu santo sa kamatuoran nga magauban kaninyo hangtod sa kahangturan, Ang kalibutan dili makadawat kaniya kay dili man siya makita ni mailhan nila apan makaila kamo kaniya kay nagauban man siya ug nagapuyo diha kaninyo.

1 Corinto 3:16 nagaingon “ Ang lawas sa tawo maoy templo sa Diyos espiritu santo, ug ang molaglag sa templo sa Diyos nga mao kita nan pagalaglagon usab sa Diyos. Nangita kita sa Diyos aron atong mapasalamatan ug maalagaran apan ang Diyos anaa diay nagapuyo diha sa matag tawo niining ibabaw sa kalibutan, diha sa ubang sinulat nagaingon nga kun unsay imong gihimo diha sa pinakaubos nimong igsoon nan mao usay imong gibuhat ngadto sa Diyos. Mao kini ang bililhong butang diha niining maong ebanghelyo diha sa pagbalik ni Jesu-Cristo ngadto sa iyang Amahan iyan gibilin kanato ang kataposang manlalaban. Ang espiritu santo sa kamatuoran diin nagapuyo ug nagauban kanato. Nagpasabot mga igsoon nga atong isangyaw ang gugma ug panagdait ngadto sa atong isigkaingon aron sa ingon nakatuman kita sa kabubut-on sa Diyos, Kay matod pa diha sa balaang kasulatan nagaingon si Ginoong Jesus “ Paghigugmaay kamo aron ang mga katawhan nga makaila kaninyo mahibalo nga kamo akong mga tinun-an.