Si Jesus Ang Kahayag Sa Kalibutan

JUAN 8: 12~20

• 12 Miingon si Jesus, “Kahayag ko sa kalibotan. Maiya sa mosunod nako ang kahayag ug kinabuhi. Dili na sila maglakat sa kangitngit hinuon, makapanag-iya sa kahayag ug kinabuhi.” 13 Mitubag ang mga Pariseo, “Karon, nagsulti ka sa imong kaugalingon. Ang imong pagsaksi walay kapuslanan.

14 Mitubag si Jesus, “Bisan pag misaksi ko sa akong kaugalingon, tinuod ang akong gisulti, kay nasayod ko diin ko gikan ug asa ko padulong. Apan wala mo masayod diin ko gikan ug asa paingon. 15 Naghukom mo sa tawhanong paagi, apan dili ko mohukom ni bisag kinsa. 16 Kon maghukom ko, matinud-anon ang akong hukom, kay wala ko mag-inusara kondili, nag-uban nako ang akong Amahan nga nagpadala nako. 17 Nasulat sa inyong balaod nga tinuod ang gisulti kon may duha ka saksi. 18 Nagsaksi ko sa akong kaugalingon ug nagsaksi sab nako ang Amahan nga nagpadala nako.”

19 Nangutana sila, Hain ang imong Amahan?” Mitubag si Jesus, “Wala mo makaila nako ni sa akong Amahan. Kon nakaila pa mo nako, nakaila sab mo sa akong Amahan.”
20 Gisulti ni Jesus kining tanan samtang nagtudlo siya sa dapit sa templo diin gidawat ang mga halad. Apan walay midakop niya, kay wala pa moabot ang iyang panahon

PAGPAAMBIT SA MENSAHE:

Ang maong ebanghelyo maoy pagpasabot lamang nga si Jesu Cristo isip maoy gitahasan sa atong Dios Amahan nga magpakatawo ug maoy magatubos kanatong tanan, Diha na Siya sa wala pa matukod ang kalibutan, diin Siya maoy nahimong arkitekto nga tiglingaw sa amahang Dios, diha na usab siya sa panahon ni Moises siya kadtong maong bato nga nagauban ug nagagiya kang Moises diha sa ilang mga bulohaton.

Matod pa nga wala na unta kinahanglana pa ang ikaduhang kasulatan kun wala pay mga kasaypanan ang unang mga kasulatan, sa ato pa dili na kinahanglan nga magpadala pa ang Diyos sa iyang bugtong anak kun wala pay mga kakulangon ang iyang gipangtahasan sa unang kasulatan, diin mao gayuy gusto sa Diyos nga maluwas kitang tanan gikan sa dakong slot didto sa kalayo sa impyerno

Iyang gipadala ang nating karnero sa Diyos nga buhing halad alang kanatong tanan, halad dili mananap nga sinunog kundili halad ingon nga buhing lawas ug dugo ni Jesu- Cristo, diin mao kini ang pamaagi sa Amahan aron maluwas kitang tanan sa iyang mga kasal-anan.

Siya maoy gihimo sa Diyos nga kahayag sa matag-usa kanato ingon nga ang tanaan nga nagasunod ug nagatuman sa mga kasugo-an sa Diyos ug nagatuo nga si Jesu Cristo ang matuod nga anak sa Diyos nan maiya ang kinabuhing dayon. Walay makaadto sa Amahan kundili moagi kaniya tungod kay siya man ang Alpha ug ang omega ang sinugdanan ug ang kataposan.

Colosas 1: 15 nagaingon Si Jesu Cristo ang buhing larawan sa dili makita nga Diyos , Siya ang panganay sa tanang mga binuhat ,ug diha kaniya nagsumikad ang kaluwasan kanatong tanan.