Ang Gahom Sa Anak

JUAN 5: 19~29

• 19 Mitubag si Jesus, “Sultihan tamo.” Ang anak walay mahimo sa kaugalingon lang gawas sa makita niya nga gibuhat sa Amahan. Ang gibuhat sa Amahan buhaton sab sa anak, 20 kay ang Amahan nahigugma sa Anak nga iyang gipakita sa tanan niyang gibuhat. Pakitaon pa siya sa iyang Amahan og mga butang nga labi pang dagko kay ini aron mahibulong mo.

21 Ingon nga gibanhaw sa Amahan ang mga patay ug gihatagag kinabuhi, ang anak sab mohatag og kinabuhi kang bisag kinsa nga buot niyang hatagan. 22 Sa samang paagi, ang Amahan dili mohukom ni bisag kinsa. Gitugyan niya sa anak ang tanang hukom, 23 ug buot siya nga ang tanan magpasidungog sa Anak ingon nga nagpasidungog sila sa Amahan. Ang nagsalikway sa Anak nagsalikway sab sa Amahan nga nagpadala niya. 24 Sa pagkatinuod sultihan tamo, ang mamati sa akong pulong ug motoo sa nagpadala nako, makabaton sa kinabuhing dayon. Dili na siya hukman, kay naluwas siya gikan sa kamatayon ngadto sa kinabuhi.


25 Sultihan tamo, taliabot ang panahon, ug gani miabot na, kanus-a makabati ang mga patay sa tingog sa Anak sa Diyos ug mabuhi ang namati ini. 26 Kay ang Amahan may kinabuhi sa iyang kaugalingon; sa samang higayon gitugyan niya sa anak ang pagbaton og kinabuhi sa iyang kaugalingon. 27 Gihatagan sab niya ang anak sa gahom pagpahamtang og silot, kay anak man siya sa tawo. 28 Ayawg katingala: moabot ang panahon nga ang nangamatay ug ang naa sa lubnganan makabati sa akong tingog 29 ug manggawas. Ang maayog binuhatan mabanhaw aron mabuhi. Ang daotan mabanhaw aron silotan.

PAGPAAMBIT SA MENSAHE:

Ang maong ebanghelyo maoy pagpasabot lamang nga ang gahom sa Amahang Dios mao usab ang gahom sa anak kay matod pa diha sa ubang pulong sa ubang kasulatan nagaingon, Colosas 1: 15, Si Jesu-Cristo ang buhing larawan sa dili makita nga Diyos, Sa ato pa mga igsoon sa dili masabot nga panag-ingnan nga ang Dios Amahan ug ang Dios nga anak usa ra.

Dinhi na si Jesus Cristo sa wala pa mabuhat ang kalibutan, Siya ang Arkitekto nga tiglingaw sa Amahng Diyos diha sa gibuhat nila ang kalibutan. Juan 1: 14 nagaingon Siya ang pulong nga nagpakatawo ug nakig-uban diha kanato. Philipos 2: 6~11 nagaingon : Diha na kaniya ang kinaiya gayod sa Dios, Apan wala siya maghuna-huna pagpakigtupong sa Diyos pinaagi sa kusog, Kundili sa iyang kaugalingong kabubut-on iya kining gibiyaan, ug gisul-ob niya ang kinaiya sa usa ka sulogoon, Natawo siya sama kanato ug nakita siya ingon nga tawo, Nagpaubos siya ug nagmasinugtanon hangtod sa kamatayon niya sa krus.

Diin dako ang kadaugan ni Jesu Cristo diha sa tahas nga gisangon kaniya sa Amahan, diin pinaagi niini nabanhaw siya ug gibayaw ang iyang lawas ngadto sa langit ug milingkod sa tuong dapit sa iyang Amahang Dios ug pinaagi niini gihatagan siya ug dungganan nga ngalan diin ang tanang binuhat didto sa langit , dinhi sa yuta ug didto sa ilawom sa yuta moluhod ug magpasidungog sa iyang ngalang Jesu Cristo.

Sa ato pa mga igsoon usa ka pagpamalandong nga ang gahom sa anak nga gipasinati sa Diyos kanato maoy talagsaong mensahe diha sa diwa o kinabuhi nga kristuhanon, diin hubo siya sa materyal nga bahandi dinhi sa ibabaw sa kalibutan wala niya dad-a ang kinatibuk-an nga kasundalohan didto sa iyang gingharian sa langit kundili nagpaubos siya aron ipakita nga ang gahom sa Diyos diha kang Jesu-Cristo dili gahum sa pagpasigarbo kundili gahum sa pagpaubos Sama nga ang pulong sa Diyos pulong sa pagpaubos.

Ingon niana ang pagtudlo ni Jesus sa iyang mga sumosunod, kay matod pa diha sa ubang sinulat sa balaang kasulatan nagaingon kun gusto nimong mamahimong dako didto sa gingharian sa langit nan maga-alagad ka sa daghang katawhan dinhi sa yuta, kay si kinsa kadtong nagpakaubos sa iyang kaugalingon dinhi sa yuta nan ipataas didto sa iyang ginghari-an sa langit, apan ang mapahitas-on dinhi sa ibabaw sa yuta nan ipaubos ug dili ilhon nga iyang anak didto sa ginghari-an sa langit.