Kinabuhi Nga Minando-an Sa Espiritu

ROMA 8 :1~17

8 • 1 Wala nay dakong panagsungi alang sa nagpuyo diha ni JesuCristo, 2 kay diha niya ang Balaod sa Espiritu sa kinabuhi nga nagluwas nako sa balaod sa sala ug kamatayon. 3 Walay epekto ang balaod, kay ang unod wala man mosanong. Unya, ang Diyos nga naglaraw pagpukan sa sala, mipadala sa kaugalingong Anak nga daw tawong makasasala aron pagbuntog sa sala ining tawhanong kahimtang. 4 Gikan adto, ang kahingpitan nga tumong sa Balaod matuman na diha nila nga naglakaw dili sa dalan sa unod kondili, sa Espiritu.

• 5 Ang naglakaw sumala sa unod hilig sa mga butang sa unod; ang gidumala sa espiritu hilig sa mga butang sa espiritu. 6 Ang unod nagpunting sa kamatayon; samtang ang espiritu, sa kinabuhi ug kalinaw. 7 Gitinguha sa unod ang supak sa Diyos, bisan gani sa balaod sa Diyos. 8 Busa, ang naglakaw sumala sa unod dili makapahimuot sa Diyos.

9 Apan dili mo ubos sa pagdumala sa unod kondili, sa espiritu kay ang Espiritu sa Diyos naa man ninyo. Kon wala pa, dili unta mo masakop ni Cristo. 10 Apan kon si Cristo naa ninyo, bisag ang lawas mamatay isip sangpotanan sa sala, ang espiritu magpabiling buhi kay grasya man ni sa Diyos. 11 Kon ang Espiritu sa mibanhaw ni Cristo sa minatay naa ninyo, ang mibanhaw ni Cristo mobanhaw sab ninyo. Iya ning buhaton pinaagi sa iyang Espiritu nga nagpuyo diha ninyo. 12 Unya, mga igsoon, biyaan ta ang unod ug dili na magpuyo sumala ini. 13 Kon dili, mamatay ta. Hinuon, maglakaw ta sa Espiritu ug patyon ang mga buhat nga lawasnon aron mabuhi ta. 14 Ang naglakaw sa Espiritu sa Diyos, mga anak sa Diyos.

15 Mawala na ang kahadlok, kay wala man mo makadawat sa espiritu sa kaulipnan. Ang inyong nadawat mao ang Espiritu nga naghimo ninyo nga mga anak. Matag sangpit nato: “Abba, Amahan,” 16 ang Espiritu nagpasalig sa atong espiritu nga 17 mga anak ta, ug mga sumusunod. Maato ang kabilin sa Diyos nga paambitan nato ni Cristo; kay kon nag-antos ta karon uban niya, moambit sab ta sa Himaya uban niya.

18 Akong giisip nga ang pag-antos sa atong kinabuhi karon dili makatumbas sa Himaya nga ipadayag ug ihatag kanato. 19 Ang tanang binuhat mahinangpong nagpaabot sa pagkatawo diha sa himaya sa mga anak sa Diyos. 20 Kay ang kalibotan naulipon man sa kapakyasan. Wala ni maggikan sa kaugalingon, apan sa nag-ulipon ini. 21 Hinuon, duna niy paglaom, kay bisan ang gimugnang kalibotan maluwas sa kamatayon ug makaambit sa kagawasan ug Himaya sa mga anak sa Diyos.

PAGPAAMBIT SA MENSAHE:

Ang maong ebanghelyo maoy pagpasabot lamang as pagkinabuhi nga langyaw niining kalibutana apan haom didto sa gingharian sa Diyos diin atong isalikway ang mga tawhanong kailibgon ug mga tawhanong kinaiyahan. Mao kini ang pagkinabuhi nga ubos sa grasya ug panalangin sa espiritu santo sa Diyos, ang hiyas ug kinaiyahan nga gisul-ob ni Jesu Cristo. Ang pagkamangindawaton, pagpaubos ug ang pagkamainampoon.

Apan matod pa nga ania pa kita sa kalibutan diin ang kalibutan gigamhan sa sala, nan kita nga mga katawhan niining kalibutan makasala gayud sa kasing-kasing sa huna-huma ug sa buhat. Ang Diyos nagsabot niining tanan diin kita gitagaan sa tulomanon sa mga pag-ampo diha sa matag balaang oras aron kapanalipdan ang imong kalag ug malig-on ang imong espiritu ug sa hinay-hinay mausab ang imong tawhanong hiyas ug binuhatan diin mamahimo nga sa kanunay ikaw magasimba niining espiritu santo sa kamatuoran.

Mao kini ang pagsimba nimo didto sa langit diin bisan nia ka pa sa yuta apan ato na nga buhaton ang mga bulohaton sa mga katawhan didto sa gingharian sa langit apan gikinahanglan nimo ang imong buhing lawas nga maoy imong ihalad ngadto sa Diyos diin anaa ang pagbalaan ug ang paglikay diha sa mga kasal-anan. Kay mao gayuy gusto sa Diyos nga kita nagaalagad kaniya sa bug-os gayud diin nahiusa ang imong huna-huna ug ang imong kasing-kasing, diin mao kini ang matuod nga pagsangyaw sa tinago nga kamatuoran diin atong ipakita sa Diyos nga ang kamatuoran nga iyang gihatag kanato atong gibuhat diin hingpit hinlo aron sa ingon natuman nato ang iyang kabubut-on.

Kay ang balaan kasulatan nagaingon nga kun gusto nimo nga daygon dinhi sa ibabaw sa yuta nan pas-ana ang imong krus, sunod sa pagtulun-an nga gisangyaw ni cristo kay bulahan ka nga nakaambit diha sa mga kasakitan ni Jesu Cristo diha sa iyang paglansang sa krus kay makaambit ka usab sa himaya sa iyang pagkabanhaw didto sa iyang gingharian sa langit.