Si Pedro Gitabangan Sa Mga Anghel

BUHAT 12: 6~19

6 Ana gyong gabhiona, sa wala pa siya paatubanga ni Herodes aron hukman, natulog si Pedro nga gitaliwad-an sa duha ka sundalo. Gigapos siya sa duha ka kadena samtang may laing mga gwardiya nga nagbantay sa ganghaan sa prisohan. 7 Sa kalit, may anghel sa Ginoo nga mibarog ug ang kahayag midan-ag sa selda sa prisohan. Unya, ang anghel mipikpik sa kilid ni Pedro. Gipukaw siya sa pag-ingon, “Bangon dayon!” Dihadiha ang mga kadenang naggapos sa iyang kamot nangahubad ug nangahulog. Ang anghel niingon, “Pagbakos ug pagsul-ob sa imong sandalyas.” Mituman si Pedro, 8 ug ang anghel midungan pag-ingon, “Karon, pagkupo ug sunod nako.”

9 Si Pedro misunod niya sa gawas. Apan wala siya nakamatngon nga tinuod diay ang panghitabo uban sa anghel. Nagtoo siya nga panan-awon lang ni. 10 Gilabyan nila ang unang gwardiya ug unya, ang ikaduha ug naabot sila sa puthawng ganghaan, ang agianan paggawas na sa syudad. Nabukas nig iyaiya ra alang nila. Migawas sila ug miagi sa higpit nga agianan; dayon, gibiyaan siya sa anghel. 11 Unya, si Pedro nga gibalikan sa iyang panimuot, nag-ingon, “Karon nahibawo na ko nga ang Ginoo nagpadala sa iyang anghel. Giluwas ko niya sa kamot ni Herodes ug sa tanang giandam sa mga Judio alang nako.”

12 Nakaamgo si Pedro sa iyang kahimtang ug miadto sa balay ni Maria, ang inahan ni Juan nga naila sab nga Marcos. Daghan ang nagkatigom didto ug nag-ampo. 13 Sa pagtuktok niya sa pultahan sa gawas, ang binatonan, si Roda, mitubag. 14 Sa pagkabati niya sa tingog ni Pedro nalipay siya pag-ayo. Inay buksan ang pultahan midagan siya sa sulod aron pagpahibawo nga si Pedro naa sa pultahan. 15 Miingon sila, “Nabuang ka man tingali!” Kay namugos man siya, miingon sila, “Ang iya nang anghel.” 16 Adtong tungora, si Pedro nagpadayon pagtuktok. Wala madugay giablihan nila ang pultahan ug natingala sila sa ilang nakita. 17 Misenyas siya sa iyang kamot sa paghilom ug miasoy giunsa siya pagpagawas sa Ginoo sa prisohan. Unya, miingon siya, “Sultihi ini si Jaime ug ang kaigsoonan.” Mibiya siya ug miadto sa laing dapit. 18 Sa kaadlawon ang mga sundalo nagubot pag-ayo sa nahitabo ni Pedro. 19 Gipapangita siya ni Herodes. Kay wala man siya makit-i, gipaimbestigar ang mga gwardya ug gipapatay. Hu- man ini. Gikan sa Juda miadto si Pedro sa Cesarea ug mipuyo didto.

PAGPAAMBIT SA MENSAHE:

Ang maong ebanghelyo maoy pagpasabot lamang nga diha niining maong ebanghelyo sa kanunay ang Diyos nanalipod sa iyang mga tinawag nga mga katawhan, nanalipod sa iyang unang mga magsasangyaw diin ilang gitagaan ug bili ang mga milagro nga ilang nasinati pinaagi diha kang Cristo Jesus.

Ginaingon nga diha sa ubang sinulat sa balaang kasulatan nga ang mga katawhan nga nagasunod sa pagtulon-an ni Cristo makaambit gayud sa mga paglutos, diin gihimong panag-ingnan ang mga buhat ni Jesu Cristo niadtong nagkinabuhi pa siya ingon nga tawo ug nakig-uban diha sa iyang mga sumosunod.

Niining maong ebanghelyo gipakita sa Diyos ang mga milagro nga iyang gipadangat ngadto kang Pedro diin gilutos siya sa iglisea nga iyang gibarugan. Si Pedro mao man gang unang tawo nga gipili ni Jesu Cristo nga mamahimo niyang apostoles diin siya gitawag man ug Simon nga usa ka mananagat.

Mateo 16: 18 nagaingon Si Jesus , “Simon ikaw si Pedro ug ibabaw niining bato itungtong ko ang akong iglisea ni ang kamatayon dili makabuntog niini. Ang Pedro sa pinulongan ng Hebreo nagkahulugan kini nga “Petros” nga sa iningles “hard rock” nga sa ato pa gahi nga bato, sa ato pa ang gipasabot ni Jesus diha sa mao niyang pulong nga itongtong niya ang iyang iglisea ibabaw sa maong bato, nga iyang ipaagak ang iyang pagtulon-an diha kang Pedro ug bisan diha sa kamatayon magapadayon kini sa paglambo.

Didto man gayud mamatay si Pedro sa Roma, ang bantugan siyudad niadtong panahuna diin mao kini ang nabantog nga Roman Empire diin, diin nabantog usab kini sa mga pagano nga pagtulon-an ug manlulutos sa pagtulon-an nga kristyanismo. Didto si Pedro gibitay sa krus nga nagtu-ali diin naga-una ang iyang tiil ug ang iyang ulo tua sa ubos diin matod pa , mao gayud kini ang hangyo ni Pedro ngadto sa mga berdugo aron sa ingon masinati niya ang mga kasakitan sa iyang magtutudlo ug Ginoo.

Iyang gipakita nga diha sa mga paglutos nga iyang nasinati, wala niya kini dagani, ug diha sa pag-akto na gayud sa pagputol sa iyang liog nan mipahiyom siya nag naga-awit sa himaya sa Diyos tungod kay nakaila siya sa iyang gialagaran ug walay pulos ang iyang materyal nga lawas kay nasiguro man niya ang kapaingnan sa iyang kalag. Kini nagpasabot lamang diha sa ubang sinulat sa balaang kasulatan nga nagaingon ayaw kahadluki ang tawo nga makapatay lamang sa imong lawas apan walay mahimo sa imong kalag, maoy kahadluki ang Diyos nga makalaglag sa imong lawas ug kalag sa impyerno.


.