2 CORINTHO 4: 1~15
4 • 1 Busa, wala mi mabugnaw sam tang among gituman ang pag-alagad nga sa kaluoy gihatag kanamo. 2 Gisalikway namo ang kamatuorang natunga; wala mi magminarama; wala mi magtuis sa mensahe sa Diyos. Hinunoa, pinaagi sa pagpadayag sa kamatuoran, naangkon namo ang pagtahod sa tanan atubangan sa Diyos.
3 Gani kon ang Ebanghelyo nga among giwali nagpabiling hanap, hanap lang ni alang sa nawala. 4 Ang dios ining kalibotana nagbuta sa salabotan sa wala motoo aron dili sila makakita sa kahayag sa mahimayaong Ebanghelyo ni Cristo, ang larawan sa Diyos. 5 Dili ang kaugalingon ang among giwali kondili, si Cristo Jesus isip Ginoo. Tungod ni Jesus nainyo ming sulugoon. 6 Ang Diyos nga nag-ingon: “Pasigaa ang kahayag gikan sa kangitngit”, nagpasiga sa kahayag sa atong kasingkasing aron mokaylap ug mabutyag ang Himaya sa Diyos nga nagsiga sa nawong ni Cristo.
7 Hinuon, atong gihuptan ang maong bahandi sa mga kulon aron kining walay tupong nga gahom dili isipong atoa kondili, sa Diyos. 8 Mga pagsulay sa tanang matang nag-abot-abot nato. Apan wala mo mawad-ig kadasig. 9 Nawad-an mig tubag, apan dili paglaom. Gigukod mi, apan wala pasagdi. Natumba, apan wala magun-ob. 10 Gidala namo bisag asa sa among pagkatawo ang pagkamatay ni Jesus. Sa ingon, ang kinabuhi ni Jesus mapadayag sab dinhi namo. 11 Kay kita, ang mga buhi, sa walay hunong gitugyan sa kamatayon tungod ni Jesus aron ang iyang kinabuhi makita sa tawhanon tang pagkinabuhi. 12 Sama nga ang kamatayon nag-obra dinhi namo, diha ninyo ang kinabuhi.
13 Among nadawat ang mao rang espiritu sa pagtoo nga gihisgotan sa Kasulatan nga nag-ingon: Mitoo ko busa, misulti. Nagtoo sab mi busa, nanulti. 14 Nasayod mi nga ang mibanhaw sa Ginoong Jesus mobanhaw pod namo uban ni Jesus. Dad-on mi niya uban ninyo sa iyang atubangan. 15 Sa kataposan ang grasya moabot ninyo nga labaw kamadagayaon. Dako ang pasalamat unya, tungod sa himaya sa Diyos.
PAGPAAMBIT SA MENSAHE:
Ang maong ebanghelyo nagpasabot lamang nga ang hiyas sa espirito santo sa Diyos , ang kinaiyahan ni Jesu Cristo mao man ang espirituhanong bahandi nga atong madawat kun atong ipapuyo si Jesu-Cristo diha sa tagsa-tagsa nato ka kasing-kasing , diha sa atong materyal nga lawas nga maoy giisip diha niining ebanghelyo nga yutan-ong sudlanan.
Diha sa ubang sinulat nagaingon nga kun giisip mo si Jesu Cristo nga imong Diyos, imong manluluwas ug manunubos nan makaambit ka gayud sa mga pagpanlutos. Kay mao gayuy gusto sa Diyos Amahan nga ang iyang tinawag ug pinili nga mga katawhan pagasulayan gayud ug dili kay magalingkod lang ug magahulat kun kanus-a mobalik ang Ginoong Jesus.
Diha sa ubang sinulat nagaingon : " Kun gusto nimong himaya-on ug daygon didto sa gingharian sa langit nan puy-i ang kinabuhi nga puno sa pangpanlutos ug pagyubit dinhi sa ibabaw sa yuta, pas-ana ang imong krus sa kinabuhi ug sunod sa pagtulon-an nga gisangyaw ni Cristo, kay bulahan ka nga naka-ambit sa mga kasakitan nga nasinati ni Jesus diha sa paglansang sa krus kay makaambit ka usab sa himaya sa iyang pagkabanhaw didto sa iyang gingharian sa langit.
Walay laing taming diha sa mga kasakitan ug mga pagpanlutos nga atong na-agi-an mao ra gayud ang mga pag-ampo, paghalad ug ang pagsantos nga rosaryo, atong himoong buhing halad ang atong materyal nga lawas isip yutan-on nga sudlanan sa espituhanong bahandi pinaagi diha sa pagbalaan, pagpaubos ug mga sakripisyo diha sa mga santa krus.
Mao kini ang matuod nga pagsimba , ang paglinis siha sa imong materyal nga lawas ug ang pagpreparar sa imong kalag sa pagsimba didto sa gingharian sa langit. Nia pa kita sa kalibutan, diin giharian sa mga dautang espiritu diin matod pa parehas na ug gahum ang dautan ug ang espiritu santo dinhi sa ibabaw sa yuta, kay mao gayuy gusto sa Amahan nga iyang alig-igon ang iyang mga katawhan, nga sa ato pa ang mg pinili niyang mga katawhan pagapili-an pa.
Bisan diha sa pagtulun-an nining ibabaw sa kalibutan , diin 44,000 na ka pagtulun-an ang nagapasibantog nga nagasimba sa Diyos ug nagpadayag sa kaluwasan, apan ang Diyos nagaingon lahi-lahi ang pagtawag ko kaninyo ug dili ang tanan nagatawag "Diyos ko" makasulod sa iyang gingharian sa langit kundili kadto lamang nagtuman sa iyang kasugo-an. Matag pagtulun-an adunay pinili ang Diyos apan usa lamang ang pagtulun-an nga tinukod sa Diyos , Ang pagtulon-an ng tinukod sa atong Ginoong Jesu-Cristo diin diha sa iyang pagbalik sa kataposang paghukom kini nga pagtulun-an maoy iyang gitahasan sa pagpadayag sa tinago nga kamatuoran.
Juan 4: 21 nagaingon si Jesus nadto sa babaye nga taga-Samaria " Tuohi ako babaye, Taliabot na ang panahun ug karon miabot na, nga wala nay magasimba sa Amahan niining bukira ni sa Jerusalem, kay ang matuod nga magsimba sa Amahan, magasimba sa espiritu santo ug sa kamatuoran.... kay sila ang magsisimba nga maoy gusto sa Amahan nga magsimba ngadto kaniya.
Miabot na ang maong pagtulun-an mga igsoon diin mao kini matuod nga pagsimba ngadto sa Diyos nga dili Makita ug mahikap, ang espirituhanong bahandi nga gibilin sa Diyos Jesu Cristo ngadto sa iyang mag katawhan, Juan 14: 15 nagaingon “ Tumana ninyo ang akong mga sugo ug mangayo ako sa Amahan ug tagaan kamo niya ug laing manlalaban ang espiritu santo sa kamatuoran nga magauban kaninyo hangtod sa kahangturan, ang kalibutan dili makadawat kaniya kay dili man siya Makita ni ma-ila nila apan maka-ila kamo kaniya kay nagpuyo man siya ug naga-uban diha kaninyo.
No comments:
Post a Comment