Ang Kamatuoran naghatag Kaninyo Ug Kagawasan

JUAN 8: 31~47

31 Busa, miingon si Jesus sa mga Judio nga nanoo, “Kon tumanon ninyo ang akong mga pulong, matinuod mo nga akong mga tinun-an. 32 Mahibawan ninyo ang kamatuoran nga maghatag ninyo og kagawasan.” 33 Mitubag sila, Mga kaliwat mi ni Abraham ug wala maulipon ni bisag kinsa. Unsay gipasabot nimo sa pag-ingon, “Maghatag og kagawasan?”

34 Mitubag si Jesus, “Sa pagkatinuod sultihan tamo, ang makasala ulipon sa sala. 35 Apan ang ulipon dili magpabilin sa panimalay sa hangtod; ang anak magpabilin. 36 Busa, kon ang Anak maghatag og kagawasan, magawasnon mo. 37 Nasayod ko nga kaliwat mo ni Abraham. Apan naninguha mo pagpatay nako, kay ang akong mga pulong wala may lugar diha ninyo. 38 Akong gisulti ang nakita nako uban sa Amahan; buhata pod ang nakita ninyo uban sa inyong amahan.”

39 Mitubag sila, “Si Abraham ang among Amahan.” Miingon si Jesus, “Kon mga anak mo ni Abraham, buhaton unta ninyo ang iyang gibuhat. 40 Apan buot mong mopatay nako nga nagsulti ninyo sa kamatuoran – ang kamatuoran nga akong nadungog sa Diyos. Wala ni buhata ni Abraham, 41 gibuhat ninyo ang buluhaton sa inyong amahan.” Miingon ang mga Judio, “Dili mi mga anak sa gawas. May usa mi ka Amahan, ang Diyos.” 42 Miingon si Jesus, “Kon ang Diyos pay inyong Amahan, mahigugma unta mo nako, kay miadto ug gikan ko sa Diyos. Mianhi ko dili sa kaugalingon kong kabubut-on kondili, Siya mismo nagpadala nako. 43 Nganong dili mo makasabot nako? Kay dili man mo makadawat sa akong pulong.

44 Mga anak mo sa yawa, ug tumanon ninyo ang mga daotang tinguha sa inyong amahan, mamumuno sukad sa sinugdan. Wala siya magkinabuhi sa kamatuoran, kay diha niya walay kamatuoran; ug kon mosulti siyag bakak, nagsulti siya sa iyang kaugalingon, kay bakakon man siya ug amahan sa bakak 45 Kay nagsulti man ko sa kamatuoran, dili mo manoo. 46 Kinsa ninyoy makakitag bisag unsang dili tinuod sa akong kaugalingon? Unya, nganong dili mo motoo kon nagsulti ko sa kamatuoran? 47 Ang iya sa Diyos mamati sa mga pulong sa Diyos; dili mo mamati, kay dili mo iya sa Diyos.”

PAGPAAMBIT SA MENSAHE:

Ang maong ebanghelyo nagpamatuod lamang diha sa ubang sinulat sa balaang kasulatan nga nagaingon (Juan 14: 6) Ako ang dalan ang kamatuoran ug ang kinabuhi, walay mahiadto sa Amahan kundili magaagi kaniya tungod kay siya ang sinugdanan ug ang kataposan. Sa ato mga igsoon ang ulohan sa maong ebanghelyo nagpasabot nga si Jesus ang kamatuoran ug siya maoy nagahatag kanato ug kagawasan diha sa kinabuhing dayun.

Siya ang gipasabot nga nating karnero sa Diyos nga nagawagtang sa sala sa kalibutan, nating karnero tungod kay siya maoy buhing halad ngadto sa Diyos pinaagi sa paglansang kaniya sa krus aron nga kitang tanan adunay kahigayonan nga maluwas ngadto sa kinabuhing dayon.

Lawas ug dugo ni Jesus Cristo maoy bugti sa atong kaluwasan, mao nga mahal gayud ang paglukat sa Diyos kanato. (Juan 14:15) Tumana ninyo ang akong mga sugo ug mangayo ako sa Amahan ug tagaan kamo niya ug laing manlalaban, ang espiritu sa kamatuoran nga magauban kaninyo hangtod sa kahangturan, Ang kalibutan dili makadawat kaniya tungod kay dili man sila makakita ni makaila kaniya, apan makaila kamo kaniya tungod kay nakig-uban man siya ug nagpuyo diha kaninyo.

Matod pa diha sa ubang pulong sa balaang kasulatan nagaingon nga dili una kamo mag puasa samtang ang pamanhonon uban pa kaninyo, ayha na kun sa hingpit Siya mobalik na ngadto sa kiliran sa iyang Amahang Diyos. Diha niining maong pulong nagpasabot lamang mga igsoon nga ang pagpuasa usa ka bulohaton nga kristuhanon, diin kita magalikay sa pagbuhat sa mga sala gikan sa pagkabanhaw ni Jesu-Cristo ug dili nato undangon ang pagpuasa hangtod sa pagbalik sa Diyos alang sa katapusang paghukom.

Diin diha sa mga milagro ug mga mensahe sa espiritu santo sa Diyos naga-aghat gayud nga kita magsanto rosaryo ug maga-ampo sa matag-adlaw, ug sa kanunay mangayo ug kapasaylo-an sa atong mga kasal-anan, kay matod pa nga bisan niining panahun nga misulod na kita sa ikatulo nga siglo apan ang Diyos sa kanunay naghatag ug hataas nga pasensiya ug kapasaylo-an sa atong mga sala.

Kay matod pa dako ug gamay nga mga kasal-anan aduna gayuy kapasaylo-an kun kini atong pangayoon ngadto sa Diyos nga Jesu-Cristo , apan matod pa ang silot sa sala magpabilin apan dili na didto sa kalayo sa impyerno kundili didto na sa purgaturyo. Busa ang tanan nga mga katawhan ug mga paglutos nga atong masinati atong i-ampo ug ihalad, bisan kadtong mga tawo nag wala motuo sa Diyos angay natong i-ampo bisan kadtong mga katawhan nga gigamhan sa dautang espiritu atong i-ampo kay matod pa nga diha sa atong mga pag-ampo, kun kini dunggon sa Diyos nan kining mga tawo nga wala makaila sa Diyos mopasilong gayud sa landong sa espiritu santo, kay Diyos lamang ang adunay gahum sa pagpahumok sa matig-a nga kasingkasing sa tawo.

:

: