Ang Dakong Sugo

MATEO 22 : 34~40

34Apan sa pagkadungog sa mga Fariseo nga napahilum niya ang mga Saduceo, sila nanagtapok. 35Ug usa kanila, nga batid sa kasugoan, may gipangutana kaniya aron sa pagsulay kaniya. 36Miingon siya, "Magtutudlo, unsa man ang dakung sugo sa kasugoan?" 37Ug si Jesus miingon kaniya, "Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan. 38Mao kana ang daku ug unang sugo. 39Ug ang ikaduha sulosama ra, nga mao kini, Higugmaa ang imong silingan sama sa imong kaugalingon. 40Niining duha ka mga sugo nagasukad ang tibuok nga kasugoan ug ang mga profeta."

PAGPAAMBIT SA MENSAHE:

Ang maong mensahe nagpadayag sa kasugo-an ni Jesus dinhi sa yuta nga mao ang pagluwas kanato gikan sa mga kasal-anan ug usab aron pagpasabot sa tanang katawhan sa mga kasugo-an sa Dios Amahan nga gihatag ngadto ni Moises niadtong una pang panahun didto sa bukid sa Senai.

Ang napulo ka sugo nagkahulugan lang kini ug duha ka kasugo-an diin ang una mao ang paghigugma sa Dios labaw sa tanan ug dili ka magbaton ug laing Dios , ang ikaduha mao ang paghigugma sa imong isigkatawo sama sa paghigugma sa imong kaugalingon, diin kun nasupak mo ang bisan asa niining duruha, nan nasupak mo ang tanang kasugu-an sa Dios nga sa ato pa nagkahulugan lamang kini nga gugma gayud ang ipahari sa atong kasingkasing.

Nagpasabot usab si Jesu Cristo nga ang tawo makasala usab pinaagi lamang sa iyang huna-huna, sa iyang pulong ug sa buhat. Diin nagpasabot lamang nga mintras nagkinabuhi pa kita niining kalibutana permanente gayud kitang makasala, mao nga kinahanglan gayud ang kanunay nga pag-ampo, pagkalawat ug pagsimba aron kita mahaduol sa Dios ug masiguro nato ang atong luna didto sa ganghaan sa gingharian sa Dios.