Si Apolo Didto Sa Efeso Ug Corinto

BUHAT 18: 24~28

24 May Judio nga ginganlag Apolo, lumad sa Alejandria, nga miabot sa Efeso. Maayo siyang manulti ug batid sa Kasulatan. 25 May dyotay siyang kasinatian sa Dalan sa Ginoo. Sa dakong kadasig nagwali ug nanudlo siya nga matinud-anon bahin ni Jesus, bisag ang bunyag ra ni Juan ang iyang nahibaw-an.

26 Dihang nangusog siya pagwali sa sinagoga si Priscila ug Aquila nakadungog niya. Busa, gidala siya sa ilang balay diin gisaysay niya ang dalan sa Diyos sa mas insaktong paagi. 27 Kay si Apolo buot mang moadto sa Acaia, gidasig siya sa mga magtotoo. Gisulatan nila ang mga tinun-an aron pag-abiabi niya. Sa pag-abot gilig-on niya pag-ayo ang mga nakabig sa pagtoo tungod sa grasya sa Diyos. 28 Nakiglantogi siya sa mga Judio, ug nagmatuod nga si Jesus ang Mesiyas pinasikad sa Kasulatan

PAGPAAMBIT SA MENSAHE:

Ang maong mensahe nagpasabot lamang nga si bisan kinsa nga nagasangyaw sa kamatuoran ug nagasangyaw sa mga maayong balita iya ni Jesu Cristo. Si Apolo bisan gamay o tipik lamang ang iyang nahibaw-an bahin sa mga milagro ni Jesu Cristo apan siya nagpakatakos tungod sa iyang pagtoo ug paghigugma sa Dios.

Bulahan ang mga tawo na bisan ug wala sila makaila ni makakita sa Dios o sa mga milagro niini apan sila nagatoo ug nagpasidungog sa Dios. Kay ginaingon diha sa balaang kasulatan nga ang maayong binuhatan lamang dili makaluwas kanimo o dili maoy mahimo mong plete paingon sa gingharian sa Dios, labina kun kini imo gihimo nga aduna kay tinago nga tuyo, o tawhanon nga tuyo sama sa politkanhong katuyu-an o tawhanon nga mga pabor.

Mas maayo diay nga sa kanunay isul-ob nimo ang hiyas nga kristuhanon nga mao ang pagkampaubsanon, mapailubon ug mainampoon ug sa kanunay magasunod sa kabubut-on sa Dios Amahan. Kay ginangon nga dili ang tanan nagasangpit sa dios ang makasulod sa gingharian sa langit kundili kadto lamang nagasunod ug nagatuman sa iyang kabubut-on.