Hukom Sa Dios (Roma 2: 1~16)

1 Busa, wala kay katarongan, bisag kinsa ka pa, sa paghukom sa uban. Sa imong paghukom sa isigkatawo, nagkondenar ka sa kaugalingon, kay gibuhat nimo ang imong gihukman. 2 Nahibawo ta nga ang silot sa Diyos moabot sa naghimo sa ingon. 3 Nagtoo ba mo nga malikayan ninyo ang hukom sa Diyos sa paghukom sa uban nga inyo man nang gihimo?

4 Gipahimuslan ninyo ang Diyos ug ang walay kinutoban niyang kaayo, pailob ug kamasinabtanon. Wala mo makaamgo nga ang Diyos maayo aron madani mo. 5 Hinuon, kon magmagahi gyod ang inyong kasingkasing ug magdumili mo pag-usab, nagtigom lang mo alang sa kaugalingon og dakong silot sa adlaw sa hukom kanus-a ang Diyos tarong nga mohukom.

6 Hatagan niya ang usag usa sa angay sumala sa nabuhat. 7 Mohatag siya sa kinabuhing dayon sa nangita sa himaya, kadungganan ug tunhayng kinabuhi ug sa nagtubay sa pagbuhat og maayo. 8 Apan kapungot ug panimalos ang maangkon sa wala mag-alagad sa kamatuoran, hinunoa sa panglupig. 9 May pag-antos ug kayugot alang sa nagbuhat og daotan, una sa mga Judio unya, sa mga Griyego. 10 Apan ang Diyos mohatag og himaya, kadungganan ug kalinaw sa nagbuhat og maayo, una sa mga Judio, unya sa mga Griyego. 11 Kay ang una dili lahi sa ikaduha atubangan sa Diyos.

12 Ang nagbuhat og sala nga wala makahibawo sa Balaod, mamatay nga walay Balaod. Ang nagbuhat og sala nga nakahibawo sa Balaod, hukman sa maong Balaod. 13 Ang makapatarong nato atubangan sa Diyos dili ang pagpaminaw sa Balaod kondili, ang pagsunod ini. 14 Kon ang dili Judio nga walay balaod nagbuhat sa gisugo sa Balaod, naghatag silag balaod sa kaugalingon,

15 nagpasabot ni nga ang mga sugo sa Balaod napatik sa ilang salabotan. Ang ilang konsensya nga nagsulti sulod nila nagpasabot sab ini, sa pagkondenar o pag-aprobar sa ilang gibuhat. 16 Sumala sa akong ebanghelyo, mao pod ang mahitabo inighukom sa Diyos, sa sikretong mga buhat sa mga tawo diha sa persona ni JesuCristo.


PAGPAAMBIT SA MENSAHE:

Ang mensahe nagpasabot sa kabubut-on sa Dios diin siya pinaagi sa iyang bugtong anak mokunsad dinhi sa yuta inig abot sa gitakdang adlaw diin iyang pagahukman kitang mga katawhan sa walay pagpabor o pagpihig, ug kitang tanan parehas na ug walay labaw nga mag-atubang sa Dios ug magahulat sa iyang silot sumala sa atong binuhatan.

Bulahan kadtong kanunay nga nangandam samtang ania pa sa walog sa mga buhi , diin kanunay nagaampo ug nagbalaan ug nagtuman sa kabubot-on sa Dios. Ginaingon diha sa mensahe nga dili kita angay magahukom sa atong isigkatawo, ug si kinsa man ang nabintahaan o napihig gumikan sa binuhatan sa iyang isigkatawo, ayaw sila ug batoki, ug isumbong sa Dios Amahan kay siya maoy mosilot o mopahimatngon kanila, kay bisan kadtong makasasala ug nagdungaw na sa baba sa kamatayon dili nato matag-an ang kapaingnan sa iyang kalag kay ang Dios ra maoy nakahibalo, diin atong mapalandungan ang kamatayon ni Jesu-Cristo sa krus miingon siya ngadto niadtong tulisan “Karon dayun maga-uban ka kanako didto sa Akong Gingharian ,“ tungod sa kinasingkasing nga pagbasol ug paghinulsol nidtong tulisan diha sa baba sa kamatayon.

Ang kamatayon matod pa sa balaang kasulatan, maoy silot sa tawhanon nga sala, ug mao kini ang silot sa Dios nga atong nasunod gikan pa nila ni Adan ug ni Eba ug gitawag nga silot sa sala nga panulondon, ug nagkahulogan nga sa abog kita gikan, nan sa abog sab kita pauli, apan ginaingon nga ang tawhanon lang nga lawas sa tawo ang mamatay ug ang iyang espiritu mobalik sa Dios didto sa langit ug ang iyang kalag maoy maghulat sa katapusang paghukom.

Ang kalag sa tawo wala nay kagahum sa pag-ampo para sa kaugalingon diin ato na lang isalig sa mga tawong buhi ang mga pag-ampo para sa atong kaugalingon, ug bulahan kadtong mga kalag nga adunay bahandi nga espirituhanon diin walay kawatan nga makakuha o taya nga magakutkot kay may luna na man unya sila didto sa ganghaan sa langit, apan kadtong mga kalag ang ilang bahandi tawhanon nahibilin kini sa yuta nan diha ra sab sila kutob.

Mas maayo diay mga igsoon nga samtang ania pa kita sa walog sa mga buhi, puy-an ta ang kinabuhi nga iya ni Jesu-Cristo diin puno sa pagpailob, pagpasenya ug pagmainampo-on aron inig abot sa Dakong Hukom sa Dios magrasyahan unya kita sa kinabuhing dayun, diin ginaingon sa Filipos 2:8~10 nga ang kinabuhing dayun nga gisaad sa Dios niadtong nagtuman ug nagsunod sa iyang kabubut-on usa kini grasya o gasa gikan sa Dios ug dili kini ganti o premyo sa Dios kanato gumikan sa atong maayong buhat aron nga walay makapasigarbo diha sa atubangan sa Dios nga siya naluwas gumikan sa iyang maayong buhat.