Ang Pagkatawo Ni Juan Magbubunyag

LUCAS 1: 57 ~ 66

57 Ug miabut ang panahon nga iga-anak na ni Elisabet, ug siya nanganak sa usa ka bata nga lalaki. 58Ug ang iyang mga silingan ug mga paryente nakadungog nga ang Ginoo nagpakitag dakung kaluoy kaniya, ug sila nangalipay duyog kaniya. 59Ug sa ikawalo ka adlaw sila nangabut aron sa pagsirkunsidar sa bata; ug buot unta nila nga hinganlan siyag Zacarias, sama sa iyang amahan, 60apan ang iyang inahan miingon, "Dili; kondili pagahinganlan hinoon siyag Juan."

61Ug sila miingon kaniya, "Wala bayay paryenti nimo nga nagdala sa maong ngalan." 62Ug ilang gisinyasan ang iyang amahan sa pagpangutana kaniya kon unsay buot niyang ingalan sa bata. 63Ug siya nangayog sulatanan ug iyang gisulat kini, "Ang iyang ngalan si Juan." Ug nahibulong silang tanan64Ug dihadiha nabuka ang iyang baba ug naluag ang iyang dila, ug siya misulti nga nagdayeg. sa Dios.

65Ug ang ilang tanang mga silingan giabut ug kahadlok. Ug kining tanang mga butanga gisultisultihan sa tibuok kabungturan sa Judea; 66ug ang tanang nakadungog niini nagtipig niini sa sulod sa ilang mga kasingkasing, ug nanag-ingon, "Maunsa man kaha diay kining bataa?" Kay ang kamot sa Ginoo diha uban kaniya.

PAGPAAMBIT SA MENSAHE

Ang maong mensahe nagpadayag sa mga milagro sa Dios diin sa makausa pa gipakita sa Dios ang iyang kabubut-on diin naganak si Elisabeth bisan pa sa iyang pangidaron. Si Juan Bautista maoy giya nga gihatag sa Dios ngadto sa mga kristohanong pagtulon-an, diin magsumikad kaniya ang pagbunyag sa anak sa tawo nga ilansang sa Krus.

Dili pa masabtan sa katawhan niadtong panahuna, ang mensahe o ang gasa nga gidala ni Juan, diin pinaagi sa panabang sa Dios Espiritu siya gitahasan sa pagdala sa kahayag sa mga katawhan sa Ginoo. Si Jesu Cristo gibunyagan ni Juan didto sa suba sa Jordan, diin mao kini ang sugo sa espiritu santo sa Dios.

Mao kadto nga sumbanan ang gisunod sa mga kristohanong pagtulon-an niining panahuna, diin ang katawhan nga kristohanon nagapabunyag sa tubig aron maluwas sa sala nga panalundon apan magkalahi ang mga pamaagi sa mga naglainlaing pagtulon-an. Ang katoliko Romano nagbunyag sa tubig sa mga puya nga mga bata, diin aduna pa kini pagkonpirmar o ikaduha nga bunyag inig kadako-dako na sa bata. Samtang ang mga uban mga pagtulon-an nag bunyag sa tubig sa mga dagko na nga mga tawo. Apan kini nga binuhatan iya sa Dios sa ato pa pulos kini nag-agi sa iyang kabubut-on ug iyang panalangin.