Si Jesus Gilimod Ni Pedro

Lucas 22: 54~62

54 Ug ilang gidakop siya ug gidala ug gihatud ngadto sa balay sa labawng sacerdote. Ug si Pedro misagnunot nga nagpaantaw. 55Ug sa nakahaling na silag kalayo sa taliwala sa hawanan sa tugkaran ug nanglingkod libut niini, si Pedro usab milingkod uban kanila. 56Unya dihay usa ka babayeng sulogoon nga nakakita kaniya sa naglingkod siya nga nahayagan sa kalayo, ug samtang nagtutok siya kaniya, miingon, "Kining tawhana usab uban kaniya."

57Apan kini gipanghimakak niya nga nag-ingon, "Babaye, wala ako makaila kaniya." 58Taudtaud dihay lain nga nakakita kaniya ug miingon, "Ikaw usab kauban nila." Apan si Pedro mitubag, "Oy, tawo, dili baya ako." 59Ug sa paglabay sa may usa ka takna, diha nay lain usab nga nanghimatuod sa hilabihan nga nag-ingon, "Sa pagkatinuod kining tawhana usab uban kaniya, kay Galileanhon man siya."

60Apan si Pedro mitubag, "Tawo, ambut kon unsa kanang imong giingon." Ug dihadiha, samtang nagsulti pa siya, mitugaok ang manok. 61Ug ang Ginoo milingi ug mitutok kang Pedro. Ug si Pedro nahinumdom sa pulong sa Ginoo, sa iyang pag-ingon kaniya, "Sa dili pa motugaok ang manok karong adlawa, igalimod mo ako sa makatulo." 62Ug siya migowa ug mihilak sa hilabihang kasakit.

PAGPAAMBIT SA MENSAHE:

Ang maong mensahe nagpasabot lamang sa kabubut-on sa Dios diin sa bisan asa nga takna o lugar mahitabo gayod ang iyang gipamulong. Nga sa ato pa, kini nagpamatuod lamang nga ang tanan nga butang dinhi sa yuta moagi gayud sa iyang kabubut-on.

Sa samang pagtulon-an dili diay nato mapasigarbo ang atong kaugalingon , nga kita lig-on na sa mga pagsulay diha sa atubangan sa Dios, diin sama kang Pedro dili gayud diay kita makapangandak sa unsay may anaa sa atong huna-huna ug gipasibantog ug kabubut-on sa Dios nga ilimod si Jesu Cristo sa makatulo ka higayon nan maoy gayud ang natuman.

Nagpasabot lamang kini mga igsoon nga ang unsay man ang atong plano diha sa tagsa nato ka kinabuhi, ug kaugmaon, angay diay nga ihangad nato sa Dios kay aron aduna kini panalangin . Angay diay nato nga pangayoon sa Ginoo ang panalangin sa atong kaugmaon ug kinabuhi kay siya ra man ang nasayod sa tanan.

Angay kita nga magpasalamat sa mga grasya ug pagsulay diha sa atong kinabuhi kay ang tanan adunay katuyo-an. Gikinahnglan gayud nga makig-istorya kita sa Ginoo sa adlaw nga tanan pinaagi sa atong mga pag-ampo ug paghalad aron iyang ikalooy kanato ang atong mga pangayo kay ang tawo igo lang magplano apan ang Dios mao gayud ang magpahiluna ug pirmi mahatag ang atong gipangayo basta kaayohan lang.