Miduaw Si Pablo Kang Santiago

Buhat 21: 17~ 26

17Ug sa pag-abut namo sa Jerusalem, gidawat kami sa mga kaigsoonan uban sa kalipay. 18Ug sa pagkasunod nga adlaw si Pablo uban kanamo miadto sa pagpakigkita kang Santiago; ug ang tanang mga anciano didto usab. 19Ug human siya makapangomusta kanila, iyang gitagsatagsa pagsugilon kanila ang mga butang nga nahimo sa Dios taliwala sa mga Gentil pinaagi sa iyang pagpang-alagad

20Ug sa pagkadungog nila niini, ilang gidalayeg ang Dios. Ug sila miingon kang Pablo, "Igsoon, nakita mo kon unsa kahilabihan kadaghan ang mga Judio nga nanagpanoo; ug kini silang tanan mga masibuton gayud sa kasugoan. 21Ug sila gikasuginlan mahitungod kanimo nga ikaw kono nagapanudlo sa tanang mga Judio nga nanagpuyo taliwala sa mga Gentil, sa pagtudlo kanila sa pagtalikod kang Moises ug sa dili na pagsirkunsidar sa ilang mga anak, ug sa dili na paggawi sumala sa ilang mga batasan.

22Ug unsaon man niini karon? Kay siguro gayud sila nga makadungog nga nahiabut ikaw. 23Busa, buhata kining among igaingon kanimo. Aduna kami dinhiy upat ka tawo nga may panaad. 24Dad-a kining mga tawhana, ug uban kanila tumana ang bulohaton sa pagpaputli sa kaugalingon, ug bayri ang ilang mga galastohan aron makapakiskis sila sa ilang mga ulo. Sa ingon niini ang tanan mahibalo nga dili diay tinuod ang gikasugilon kanila mahitungod kanimo, ug nga ikaw gayud nagagawi diay nga matinumanon sa kasugoan.

25Apan bahin sa mga Gentil nga nanagpanoo, amo na silang gikasulatan sa among hukom nga kinahanglan ilang dumilian ang bisan unsa nga gikadulot ngadto sa mga diosdios, ug ang dugo, ug ang mga mananap nga naluok, ug ang pakighilawas." 26Ug ang mga tawo gidala ni Pablo, ug sa pagkasunod nga adlaw gituman niya uban kanila ang bulohaton sa pagpaputli sa kaugalingon, ug misulod sa templo aron sa pagpahibalo kon kanus-a matapus ang panahon sa ilang pagpaputli, nga sa maong panahon igahalad na ang halad alang sa matag-usa kanila.

PAGPAAMBIT SA MENSAHE:

Ang maong mensahe nagbutyag sa mga kahimuan sa mga apostoles niadtong panahuna, nga bisan wala na ang Ginoong Jesus apan sila nagmadasigon sa pagsangyaw sa kamatuoran . Atong mahibaw-an nga si Pablo mao man kinai si Saulo nga naglutos sa iglesia sa kamatuoran diin siya man ang usa sa mga sinaligan sa mga Judio. Apan tungod sa giya sa Dios siya gitawag pinaagi sa panan-awon ug gihimong apostoles sa maong pagtulon-an nga iyang gilutos.

Sa iyang pagduaw sa Jerusalem, daghan ang nagbutangbutang kaniya ug mga istorya, tungod kay lagi siya nakabutang man lang nga nakonberter sa maong pagtulon-an. Iya gipakita sa kinabag-an nga mga magtutuo ni Jesu Cristo ang mga hiyas nga gihatag sa Dios kaniya ug siya usab nagbag-o sa iyang hiyas diin nagsunod gayud siya sa hiyas nga langitnon.

Iyang gisalikway ang iyang mga salawayon nga hiyas ug nagpuyo sa landong sa espirito santo diin tungod ra usab sa iya kanhing binuhatan nakabutang nga pikas ug pikas ang naglagot kaniya. Apan ang tanan iyang gi-antos kay nakita man niya ang himaya sa Dios Diha sa iglesia nga iyang gibarogan.

Daghan nga mga pagtulon-an o mga experinsiya nga susama niini, diin diha sa pagbalhin nimo niini nga pagtulon-an nahimo kang ubos diha sa panan-aw sa imong kaigsoonan , ingon man nahimo kang sentro diha sa mga pagsaway ug paglutos kay lagi anaa sa pagtulon-an nga lahi apan matod pa bulahan ka nga nakasinati sa mga paglutos kay nakaambit ka sa mga kasakit ni Jesu Cristo ug nagpasabot lamang nga ang patulon-an nga imong gibarugan iya gayud sa Dios.