Gilubong Si Jesus

JUAN 19: 38~42

38 Tapus niini si Jose nga taga Arimatea, ang tinun-an ni Jesus, apan sa tago lamang tungod sa kahadlok niya sa mga Judio, mihangyo kang Pilato nga iyang kuhaon ang lawas ni Jesus; ug siya gitugotan ni Pilato. Busa miadto siya ug gikuha niya ang iyang lawas.

39Ug usab si Nicodemo, siya nga kaniadto mao gani ang nakigkita kang Jesus sa takna sa kagabhion, miadto nga nagdalag mga kalim-an ka kilo nga sinakot nga mirra ug aloe. 40Ug ilang gikuha ang lawas ni Jesus ug gibugkosan kinig mga panapton nga lino lakip ang mga pahumot, sumala sa batasan sa mga Judio sa paglubong.

41Ug sa dapit diin didto siya ilansang sa krus, diha ang usa ka tanaman, ug sa tanaman diha ang usa ka bag-ong lubnganan nga wala pa gayud kalubngi. 42Ug tungod kay adlaw man kadto sa Pangandam sa mga Judio, ug ang lubnganan haduol ra man, ilang gipahiluna si Jesus didto.

PAGPAAMBIT SA MENSAHE:

Ang maong mensahe nagpadayag lamang sa mga katumanan sa panagna sa mga propeta diin ginaingon nga ang anak sa Dios pagasakiton dagmalan, pakaulawan ug ilansang sa krus ug mamatay, ug ilubong apan mabanhaw ra usab siya sulod as tulo ka adlaw.

Ang mga tinudlo-an ni Jesus nagkatibula-ag human nga siya gisilotan sa kamatayon, apan adunay pipila nga nagpabilin nga maisugon nga mibarog sa ilang pagtuo sa pagka Dios ni Jesus.

Ilang gipahiluna ang tawhanong lawas ni Jesu Cristo ug gisunod nila ang naandan sa mga Judio sa pagpahiluna sa maong minatay. Usa lamang kini ka pagtulon-an nga gipakita ni Jesu Cristo ang pagtamod sa kasugo-an sa iyang amahan, diin iyang gidawat ang tanang pagpakaulaw ug pagpasakit sa mga Judio kaniya.

Sa pagkamatay ni Jesus namatay usab ang atong sala uban kaniya, diin mabanhaw usab kita uban ni Jesu Cristo sa pag-abot sa gitagal nga panahun, kinahanglan lamang nga magbalaan kita sa atong kaugalingon pinaagi sa paglikay sa pagpakasala ug magsunod kanunay sa iyang kabubut-on.