Gihugasan Ni Jesus Ang Tiil Sa Iyang Mga Tinun-an

Juan 13:1~20

1 Ug sa wala pa ang fiesta sa Pasko, si Jesus nahibalo nga nahiabut na ang takna sa iyang pagbiya niining kalibutana ug pag-adto sa Amahan. Ug sanglit nahigugma man siya sa mga iya nga ania sa kalibutan, sila iyang gihigugma hangtud sa katapusan. 2Ug samtang nanihapon sila, sa diha nga ang pagbudhi kaniya gikapasulod na sa yawa diha sa kasingkasing ni Judas Iscariote, nga anak ni Simon,

3si Jesus, sa nasayran niya nga ang tanang butang gikatugyan na sa Amahan ngadto sa iyang mga kamot, ug nga diha siya sa Dios magagikan ug nganha siya sa Dios mopadulong, 4mitindog siya gikan sa kan-anan, mihukas sa iyang mga sapot ug gibaksan niyag tualya ang iyang kaugalingon. 5Ug naghuwad siyag tubig sa palanggana ug iyang gisugdan ang pagpanghugas sa mga tiil sa mga tinun-an ug sa pagpahid niini sa tualya nga iyang gibakus. 6Ug miadto siya kang Simon Pedro; ug si Pedro miingon kaniya, "Ginoo, ikaw bay mohugas sa akong mga tiil?"

7Si Jesus mitubag kaniya, "Sa karon dili pa ikaw makasabut niining akong gibuhat, apan unya ugaling makasabut ra ikaw." 8Si Pedro miingon kaniya, "Dili ako pahugas kanimo sa akong mga tiil." Si Jesus mitubag kaniya, "Kon dili ka pahugas kanako, nan, wala ikaw ing bahin kanako." 9Ug si Simon Pedro miingon kaniya, "Ginoo, dili lang ang mga tiil ko ra, kondili hasta ang akong mga kamot ug ang akong ulo!" 10Si Jesus miingon kaniya, "Ang nakaligo na dili kinahanglan manghugas pa gawas sa iyang mga tiil, hinoon mahinlo na ang iyang tibuok nga lawas. Ug kamo mga mahinlo na, apan dili hinoon kamong tanan."

11Kay siya nasayud man kinsa ang magabudhi kaniya; mao man gani nga miingon siya, "Dili tanan kamo mga mahinlo." 12Ug sa nahugasan na niya ang ilang mga tiil ug nakasul-ob na siya sa iyang mga sapot ug nahibalik sa kan-anan, siya miingon kanila, "Nakasabut ba kamo sa akong gibuhat kaninyo? 13Nagatawag kamo kanako nga Magtutudlo ug Ginoo; ug husto kamo kay mao man kana ako. 14Ug kon ako nga inyong Ginoo ug Magtutudlo nanghugas man gani sa inyong mga tiil, nan, kamo usab kinahanglan mahinugasay sa inyong mga tiil, ang usa sa usa.

15Kay usa ka panig-ingnan ang akong gihatag kaninyo, aron nga kamo usab kinahanglan magabuhat sama sa akong gibuhat kaninyo. 16Sa pagkatinuod, sa pagkatinuod, magaingon ako kaninyo, ang ulipon dili labaw sa iyang agalon; ni ang sinugo labaw sa nagasugo kaniya. 17Kon kamo mahibalo niining mga butanga, dalaygon kamo kon kini inyong buhaton. 18 Dili hinoon tanan kaninyo ang gipahinungdan ko niini; ako nakaila sa mga tawo nga akong gipili; ngani kini mahitabo aron matuman ang kasulatan nga nag-ingon, `Gitindakan ako sa tikod sa tawo nga nagkaon uban kanako.

19Gipahibalo ko kini kaninyo karon, sa dili pa kini mahitabo, aron nga inigkahitabo na niini motoo kamo nga ako mao ang Cristo. 20Sa pagkatinuod, sa pagkatinuod, magaingon ako kaninyo, nga ang magadawat kang bisan kinsa nga akong igapadala magadawat kanako; ug ang modawat kanako magadawat kaniya nga mao ang nagpadala kanako."

PAGPAAMBIT SA MENSAHE:

Si Jesu Cristo Nagpadayag sa katumanan sa mga kasugoan sa Dios Amahan, diin hinay hinay ng naandam ang tanan, sama sa takna nga pagabudhi-an ang anak sa Dios hapit na moabot, ingon man ang takna nga ilansang ang Ginoong Jesus niadtong krus. Gipasabot ni Jesu Cristo ang iyang mga apostoles diin iya ng gibilin ang mga katungod sa pagsangyaw sa kamatuoran ug sa pagwali sa maayong balita.

Ang paghugas sa mga tiil sa mga apostoles mao usa ka simbolo sa paglimpyo sa mga kalag sa maong mga apostoles. Diin sila gihinlo na sa ilang mga tawhanon nga mga kasal-anan atubangan sa Dios amahan ug susama sa kang Jesu Cristo mag silbi usab ang mga apostoles sa ilang mga sumusunod, ug magpa-ilob diha sa iglesia nga ilang gibarogan, ug sa kanunay magahugas sila sa mga kalag sa ilang mga kaigsoonan nga naihisalaag.

Sa ato pa mga igsoon, ang paghugas sa tiil maoy simbolo sa pagdawat ni Jesu Cristo diha sa atong kasing kasing ug kalag, ingon man sa pagsunod sa mga hiyas nga kristohanon sa tibook natong kinabuhi, diin likayan na nato ang pagbuhat ug mga butang nga supak sa kabubot-on sa Dios aron sa ingon mabanhaw usab ang atong kalag uban ni Jesu Cristo inig-abot na sa dakong hukom sa Dios.