Si Jesus Nagtudlo Bahin Sa Pagpakigbulag

MARCOS 10: 1~12

1 Ug si Jesus mipahawa didto ug miadto sa kayutaan sa Judea ug sa tabok sa Jordan, ug didto gitapukan na usab siya sa mga panon sa katawhan; ug ingon sa iyang nabatasan, iya na usab silang gipanudloan. 2Ug dihay mga Fariseo nga miduol kaniya, ug aron sa pagsulay kaniya gipangutana siya nila nga nanag-ingon, "Alang sa usa ka lalaki, uyon ba sa kasugoan ang pagpakigbulag niya sa iyang asawa?"

3Siya mitubag kanila, "Unsa may gisugo ni Moises kaninyo?" 4Sila miingon, "Si Moises mitugot sa lalaki sa paghimog sulat-pamatuod sa pakigbulag, ug unya sa pagbulag kaniya." 5Kanila mitubag si Jesus nga nag-ingon, "Tungod sa kasagutsoton ninyog kasingkasing, nagsulat siya kaninyo sa maong sugo. 6Apan sukad sa sinugdan sa kabuhatan, `Ang Dios nagbuhat kanila nga lalaki ug babaye.`

7`Tungod niining maong hinungdan, ang lalaki magabiya sa iyang amahan ug inahan ug makigtipon sa iyang asawa, 8ug ang duha mahimong usa.` Tungod niini, dili na sila duroha kondili usa. 9Busa, ang sa Dios ginahiusa, sa tawo ayaw ipabulag sila." 10Ug diha sa sulod sa balay gipangutana na usab siya sa mga tinun-an mahitungod niini.

11Ug kanila mitubag siya nga nag-ingon, "Bisan kinsa nga mobulag sa iyang asawa ug unya mangasawag lain, makapanapaw siya batok sa iyang unang asawa; 12ug kon siya mao ang mobulag sa iyang bana ug unya mamanag lain, nakapanapaw siya."

PAGPAAMBIT SA MENSAHE:

Nagpasabot ang maong ebanghelyo sa katiunay ug ka sagrado sa kaminyoon, diin ginaingon nga ang gihiusa sa Dios dili pwedeng bulagon sa tawo, kay diha sa kaminyoon ang magtiayon dili duha ka persona sa mata Dios kundili usa lang kini.

Nga sa ato pa mga igsoon ang pagpakigbulag diin legal o maypagtugot kini sa balaod sa yuta apan wala kina makasubay sa kabubut-on sa Dios. Angayan diay nga ibalaan ang atong kaugalingon diha sa pagpakig-hiusa sa kaminyoon kay mao kini ang kabubut-on a Dios. Apan daghan pa ang mga kasinatian diha sa kristuhanon nga mga pagtulon-an diin wala nato mabasahi sa balaan kasulatan, o wala na mahisulat.

Ginaingon usab nga walay makatugkad sa kabubut-on sa Dios, diin daghan sa mga panghitabo diha sulod sa kaminyoon nga nag-agi sa kabubut-on sa Dios. Ug wala kitay katungod sa paghukom ni sa paghuna-huna sa maong mga panghitabo kay Dios ray nasayud.

Kinahanglan lamang gayud nga hugton nato ang atong pagsalig ug pagtoo sa Dios aron iya kitang kaluy-an ug hagkap ra dad-on ang mga pagsulay diha sa atong kinabuhi. Ginaingon nga ang pamilya o mag-asawa mao ang pinaka sinugdanan diha sa kinatibuk-an nga katilingban nga atong gibarugan, diin makita nato kini diha sa templo sa Dios matag adlaw nga tigsimba, kun daghan ba ug magtotoo, o diha ba sa mga kahilayan o mga buwangan kun naa ba usay daghan nagasulod. Kay kun unsa ka linaw o Diosnon ang matag panimalay nan dasig usab sila sa kalihukan sa simbahan ug kun unsa kagubot ang maong mga panimalay nan naghitak usab ang mga kahilayan dihang dapita.