Ang Halad Ni Jesu Cristo Nagwagtang Sa Mga Sala

HEBREO 9 : 23 ~ 28

23 Sa ingon niana gikinahanglan nga ang mga hulad sa mga langitnong butang pagahinloon niining mga butanga, apan ang maong mga langitnong butang pagahinloon sa labi pa ka maayong mga halad-inihaw kay niini. 24Kay si Cristo misulod dili ngadto sa usa ka balaang dapit nga hinimog mga kamot, nga hulad lamang sa tinuod, kondili ngadto sa langit gayud, sa pagpangatubang karon alang kanato sa atubangan sa Dios. 25Dili usab aron sa pagsublisubli sa iyang paghalad sa iyang kaugalingon, maingon sa tinuig nga pagsulod sa mga labawng sacerdote ngadto sa Balaang Dapit, dinala ang dugo nga dili iyang kaugalingon;

26kay kon mao pa, gikinahanglan unta nga magsublisubli siya sa pag-antus sukad sa pagkatukod sa kalibutan. Apan ingon sa karon, sa makausa ra ug sa wala nay pagsublisubli, siya mitungha sa katapusan sa kapanahonan aron sa pagwagtang sa sala pinaagi sa paghalad niya sa pagpakamatay sa iyang kaugalingon. 27Ug maingon nga ang tawo ginabut-an nga mamatay sa makausa ra, ug tapus niana mao ang hukom, 28mao man usab si Cristo, tapus makahalad sa makausa aron sa pagkuha sa mga sala sa daghang mga tawo, motungha sa ikaduha dili labut sa sala, kondili sa pagluwas hinoon kanila nga sa matinguhaon gayud nagapaabut kaniya.

PAGPAAMBIT SA MENSAHE:

Ang maong ebanghelyo naghisgot sa mga paghalad diha sa atubangan sa Dios diin sa panahun pa ni Moises ug bisan sa panahun ni Abraham uso kining paghalad sa mga sinunog nga mga mananap ngadto sa Dios Amahan apan kini nga paghalad nagaugat kini gikan sa mga pagano nga pagtulon-an ug giawat sa mga sumusunod sa Dios niadtong unang mga panahun uban usab sa panalangin ug kabubut-on sa Dios.

Sa paghiabot na ni Jesu Cristo diin siya nagpakamatay ug nagpalansang niadtong krus didto sa bukid sa kalbaryo ug nabanhaw sulod sa ikatulo kaadlaw, giundang na kining maong paghalad sa mga sinunog nga mananap tungod kay gihalad naman ni Jesu Cristo ang iyang lawas ug kalag para kanatong tanan nga makasasala nga katawhan ug diin kita naluwas sa mga sala ug nabanhaw uban kaniya kun ipadayun nato ang pagsunod sa iyang kabubut-on ug ingon man ang pagpuasa o paglikay sa pagpakasala.

Ang paghalad sa mga sinunog nga mga mananap niining panahuna human sa pagkabanhaw ni Jesu Cristo giisip na nga dili iya sa Dios o gitawag nga halad sa mga Dios-dios diin wala na kini panalangini sa Dios Amahan ug pagailhon nga nakasupak sa ilang kabubut-on. Diin ang matuod nga paghalad karong panahuna mao lamang ang pagpangaliya sa Dios Amahan inubanan sa hugot nga pagbasol ug paghinulsol ug ingon man ang pagtugyan sa hingpit sa imong kinabuhi ngadto sa Dios makagagahum.