Ang Pagkunsad Sa Espiritu Santo

BUHAT 2 : 1~13

1 Ug sa pag-abut na sa adlaw sa Pentecostes, silang tanan nagkatigum sa usa ka dapit. 2Ug sa kalit may miabut nga dahunog gikan sa langit ingon sa huros sa makusog nga hangin, ug kini mipuno sa tibuok balay diin didto sila nanaglingkod. 3Ug dihay mipakita kanila nga mga dila nga daw kalayo, nga nagtinagsaay sa pagpatong sa ibabaw sa matag-usa kanila. 4Ug silang tanan napuno sa Espiritu Santo ug misugod sila sa pagsulti sa nagkalainlaing mga pinulongan, sumala sa ipalitok kanila sa Espiritu.

5 Ug didto sa Jerusalem may nanagpuyo nga mga Judio, mga tawong masimbahon gikan sa tanang kanasuran ubos sa langit. 6Ug sa nabanha na, ang kadaghanan nanagpanugok ug sila nangalibog kay ang matag-usa nakadungog man sa mga apostoles nga naglitok sa pinulongan sa matag-usa nga nakadungog. 7Ug sila nahingangha ug nahibulong, nga nanag-ingon, "Tan-awa ra, dili ba mga Galileanhon man kini silang tanan nga nanagpanulti? 8Ug naunsa ba nga ang tagsatagsa kanato nakadungog man kanila nga nagasulti sa atong matag-kaugalingong pinulongan nga natawhan?

9Kitang mga taga-Partia, ug mga taga-Media, ug mga taga-Elam, mga molupyo sa Mesopotamia, Judea ug Capadocia, Ponto ug Asia, 10Frigia ug Panfilia, Egipto ug sa kayutaan sa Libya nga sakop sa Cirene, ug mga domoluong gikan sa Roma, mga Judio ug mga kinabig, 11mga taga-Creta ug mga taga-Arabia--kitang tanan pinaagi sa atong matag-kaugalingong mga sinultihan nakadungog kanila nga nagasugilon mahitungod sa kahibulongang mga buhat sa Dios." 12Ug ang tanan nahingangha ug nangalibog nga nanag-ingon sa usa ug usa, "Unsa man kahay buot ipasabut niini?" 13Apan dihay nanag-ingon agig bogalbugal, "Kana sila nangabasdak sa tam-is nga bino."

PAGPAAMBIT SA MENSAHE:

Ang maong ebanghelyo nagpasabot sa giya sa espiritu santo nga magasulti sa matag tawo, diin natingala ang mga naminaw matod sa maong ebanghelyo kay nagasulti man ang mga katawhan sa lain-laing sinultihan, ang uban natingala ug ang uban usab nagbugal-bugal kay gipakaingon nila ug nahubog lamang ang maong mga katawhan.

Kini nagapasabot lamang nga walay makatukib o makasukod sa kabubut-on sa Dios, diin ang tanang pulong diha sa bibliya atong makita nga puno sa kadetalyado apan kini gisulat sa mga yano nga lungsoranon pinaagi sa diktar sa gahum sa espiritu santo.

1 Corinto 1: 28 nagaingon gipili sa Dios ang mga tinamay ug mga sinalikway, ug gipkawalay bili sa mga tawo aron ang mga makinaadmanon ug mga may kaalam dili makapasigarbo diha atubangan sa Dios , kay walay bili didto as langit ang mga tawhanon nga kaalam, apan kun aduna man ugaling angay ipasigarbo nan kadto lamang mga milagro nga nahimo diha sa atong kinabuhi.