Ang Ilis Ni Judas

BUHAT 1: 12 ~ 26

12 Ug unya namauli sila sa Jerusalem gikan sa bungtod nga ginganlan ug Olivo nga duol sa Jerusalem, nga may gilay-on nga sama sa malakaw sa usa ka adlaw nga igpapahulay. 13Ug sa nakasulod na sila, misaka sila sa lawak sa itaas diin didto mag-abutan sila si Pedro ug si Juan ug si Santiago ug si Andres, si Felipe ug si Tomas, si Bartolome ug si Mateo, si Santiago nga anak ni Alfeo, si Simon nga Zelote ug si Judas nga anak ni Santiago. 14Kini silang tanan nanagpadayon sa paghiusa sa pag-ampo, kauban sa mga babaye lakip kang Maria nga inahan ni Jesus, ug kauban sa iyang mga igsoong lalaki.

15 Ug niadtong mga adlawa si Pedro mitindog taliwala sa kaigsoonan (dihay pundok sa mga usa ka gatus ug kaluhaan ka tawo), ug miingon kanila, 16"Mga igsoon, kinahanglan nga matuman gayud ang kasulatan nga gipamulong daan sa Espiritu Santo pinaagi sa baba ni David, mahitungod kang Judas nga nahimong magtotultol sa mga nanagdakop kang Jesus. 17Kay kadto siya nahiapil man kanamo ug nakabaton ug bahin niining maong pagpang-alagad.

18(Ug kini siya nakapanag-iyag usa ka luna nga yuta gumikan sa gisuhol kaniya sa iyang pagkadili matarung; ug sa pagkahulog niya nga nag-una ang ulo, mibuto ang iyang tiyan ug nahurot pagkayagyag ang iyang tinai. 19Ug nahibaloan kini sa tanang nanagpuyo sa Jerusalem nga tungod niana kadtong yutaa ginganlan ug Akeldama sa ilang pinulongan, nga sa ato pa, Yuta nga Dugoon.` 20Kay sa basahon sa mga Salmo nahisulat kini nga nagaingon: `Ipahimong awaaw ang iyang yutang puloy-anan, ug ayaw na kini papuy-ig tawo;` ug `Ang iyang katungdanan ipakuha sa lain.`

21Busa, sa mga tawo nga among gikauban sulod sa tanang panahon nga ang Ginoong Jesus misulod ug migula sa among taliwala, 22sukad sa pagpangbautismo ni Juan hangtud sa adlaw sa pagbayaw kaniya gikan kanato--usa niining mga tawhana kinahanglan himoon nga uban kanamo saksi sa iyang pagkabanhaw." 23Ug ilang gipaatubang ang duha ka tawo nga pagapilian, si Jose nga ginganlan ug Barsabas nga gianggaan ug Justo, ug si Matias.

24Ug nanag-ampo sila nga nag-ingon, "Ginoo, ikaw nga nasayud sa mga kasingkasing sa tanang tawo, ipasundayag kinsa niining duha ang imong gipili 25nga maoy mokuha sa dapit niining pagpang-alagad ug pagka-apostol nga gibiyaan ni Judas nga miadto sa iyang kaugalingong dapit." 26Ug ilang giripahan sila, ug si Matias mao ang nahitungnan; ug siya naihap nga kauban sa napulog-usa ka mga apostoles.

PAGPAAMBIT SA MENSAHE:

Ang maong ebanghelyo nagtuki sa mga gimbuhaton sa mga apostoles diin kulang na man sila ug usa kay namatay na man si Judas kinsa gisilotan sa Ginoo diha sa iyang pagbudhi niini. Dili nato masukod ang kabubut-on sa Dios diin ang mga nahabilin nga mga apostoles nagkasabot nga mangayo sila puli kang Judas pinaagi sa giya sa espiritu sa Dios diin tuod man sila gihatagan ug ang nakapuli si Matias.Diin kabubut-on as Dios ang tanan , ug nga nahimong istrumento si Judas sa kamatayon ni Jesu Cristo.

Duha ka butang ang gipakita sa maong ebanghelyo una ang pagpadayuon gayud sa mga pulong sa Dios bisan ug ang maong mga apostoles nag-anam na ug kawala tungod sa mga pagsulay, ug ikaduha ang pagsunod gayud sa kabubut-on sa Dios iha sa mga langitnong bulohaton diin ang espiritu santo gayud ang nagapili sa maong nahipuli kang Judas.

Nagpasabot lamang mga igsoon nga ili tawo ang gisunod sa mga apostoles diin sila sa kanunay mangayo sa giya gikan sa kahitas-an aron mapalstar ang ilang mga gimbuhaton. Ng mga apostoles isip mga balaan nga katawhan a ginoo kanunay nagasunod sa mga panalangin as Dios.

Sa ilang pagsangyaw sa kamatuoran diha sa upat ka suok sa kalibutan ang maong mga apostoles ni Jesus sa kanhi-ay nangayo ug giya sa Kahitas-an diin sila nagkauyon nga magabuhat ug tumailhan diha sa ilang mga sinangyawan aron nga kun sila magkakitataay makahibalo sila sa kahiusahan sa ilang pagtulon-an.

Pinaagi sa giya as espiritu santo ang mga apostoles gigiyahan as pagsulat sa pangdyeon nga Apostle’s Creed o Mitoo Ako, diin mao kini ang panagdyeon nga nagatimaan sa ilang mga sinangyawan. Sa ato pa mga igsoon ang maong mga pangadye-on balaan ug anaa pa kini hangtod niining panahuna.