Unsaon Sa Dios Paghimong Matarong Diha Sa Tawo

ROMA 3 : 21~30

21Apan karon ang pagkamatarung gikan sa Dios gikapadayag gawas sa kasugoan, ug gikapamatud-an man gani kini sa kasugoan ug sa mga profeta-- 22ang pagkamatarung gikan sa Dios pinaagi sa pagtoo kang Jesu-Cristo alang sa tanan nga magatoo. Kay walay kalainan sa Judio ug sa Gentil. 23Sanglit nakasala man ang tanan ug nakabsan sa himaya sa Dios, 24sila pagamatarungon pinaagi sa iyang grasya ingon nga gasa, pinasikad sa pagkatinubos tungod kang Cristo Jesus

25nga gitanyag sa Dios ingon nga halad pasig-uli pinaagi sa iyang dugo, sa maong halad nga pagadawaton pinaagi sa pagtoo. Kini maoy pagpakita sa pagkamatarung sa Dios, kay sa iyang langitnong pagkamainantuson gisayloan man lamang niya ang kasal-anan nga nangahimo kaniadto; 26kini maoy pagpamatuod karong panahona nga siya matarung ug nga siya magamatarung sa tawo nga may pagtoo kang Jesus.

27Nan, hain na man ang atong pagpagarbo? Gipalagpot na sa gawas. Pinasikad sa unsang lagda? Sa lagda ba sa mga buhat? Dili, hinonoa pinasikad sa lagda sa pagtoo. 28Kay maoy atong pag-isip nga ang tawo pagamatarungon pinaagi sa pagtoo, pinagawas sa mga pagtuman sa kasugoan.

29O Dios ba lamang sa mga Judio ang Dios? Dili ba Dios man usab siya sa mga Gentil? Oo, sa mga Gentil usab, 30sanglit usa ra man ang Dios; ug iyang pagamatarungon ang mga may sirkunsisyon pinasikad sa ilang pagtoo ug ang mga walay sirkunsisyon pinaagi sa ilang pagtoo. 31Gibungkag ba nato ang kasugoan tungod sa maong pagtoo? Wala gayud! Hinonoa gipabarug nato ang kasugoan.

PAGPAAMBIT SA MENSAHE:

Ang maong ebanghelyo naghubit sa pagpahiduol sa tawo ngadto sa Dios nga diin diha sa ilang pagtuo ug pagsunod kanunay sa giya sa espiritu santo sa Dios nan mahaduol sila kanunay niini. Si Jesu Cristo nagtudlo sa kalinaw , pakigdait, ug pagpaubos, pagkamagindawaton. Mao kini ang mga hiyas nga iyang gisul-ob diha sa iyang mga sumosunod ug diin mao kini ang hiyas sa espiritu santo nga ania kanato.

Nagpasabot mga igsoon nga si JesuCristo mao ang Dios sa tanang katawhan dinhi sa kalibutan sa walay pagpihig kun unsa ang imong panagway ug pagtulon-an nga gibarugan, kay matod pa ang tanan tawo ilang binuhat ug kini nagagikan sa ilang kabubut-on diin wala gayuy dautan sa tawo kundili ang iya lamang binuhatan maoy dautan ug ang maong mga binuhatan iya sa Dautan.

Nan mga igsoon angayan nato nga himayaon sa kanunay ang Dios diha sa atong kasing kasing ilabina niini nga siglo diin hataas pa ang pasensya ug pasaylo sa Dios diin sa pag-abot unya sa adlaw sa paghukom nan wala nay pasaylo pa ang Ginoo ug kitang tanan maga-atubang sa maong paghukom ug silotan tukma sa atong binuhatan.