Ang Subasko

BUHAT 27: 13~38

18Ug sanglit gilambalamba man kami pag-ayo sa bagyo, sa pagkasunod nga adlaw ilang gisugdan ang pagpanglabog sa mga karga ngadto sa dagat. 19Ug sa ikatulo ka adlaw, pinaagi sa ilang kaugalingong mga kamot ilang gipanglabog sa dagat ang mga kasangkapan sa sakayan. 20Ug sanglit wala may Adlaw ni mga bitoon nga mipakita sulod sa daghang mga adlaw, ug dili gamay ra ang bagyo nga mikusokuso kanamo, nawala na ang tanang paglaum nga maluwas pa kami.

21 Ug kay dugay na man nga wala silay kaon, si Pablo mitindog sa ilang taliwala ug miingon, "Mga higala, maayo gayud unta kadto nga nagpatoo kamo kanako ug wala na lang molayag gikan sa Creta, ug kalikayan unta kining kadaut ug kapildihan. 22Apan tambagan ko kamo sa pagsalig, kay wala kaninyoy mapilding kinabuhi gawas sa sakayan. 23Kay niining gabhiona karon dihay mitindog tupad kanako nga usa ka manolunda sa Dios ni kinsa iya ako ug kang kinsa nagasimba ako,

24ug miingon kanako, `Ayaw kahadlok, Pablo. Kinahanglan mangatubang ikaw kang Cesar, ug tan-awa, ang tanan mong mga kasakay gihatag na sa Dios kanimo.` 25Busa, mga higala, sumalig kamo, kay nagatoo ako sa Dios nga kini mahitabo gayud sibo sa gikasulti kanako. 26Hinoon mahisangyad kita sa usa ka pulo." 27Ug sa pag-abut na sa ikanapulog-upat ka gabii, sa gipadpad kami tabok sa kadagatan sa Adria, sa may mga tungang gabii ang mga sakayanon naghunhuna nga nagkahiduol na sila sa mamala.

28Ug ilang gisunda ang giladmon ug kini ilang nasuta nga kaluhaan ka dupa; ug sa unahan ug diyutay giusab nila kini pagsunda ug ilang nasuta nga napulog-lima ka dupa. 29Ug sa kahadlok nga tingali unya mahisangyad kami sa katakutan, ilang giariya ang upat ka mga angkla gikan sa ulin, ug nangandoy sila nga maadlaw na unta. 30Ug kay ang mga sakayanon may tinguha man sa pag-ikyas gikan sa sakayan, ug ila na man ganing gitonton ang bote ngadto sa dagat sa pasangil nga ang mga angkla sa dulong ila konong iariya sa layolayo, 31si Pablo miingon sa kapitan ug sa mga sundalo, "Kon kining mga tawhana dili gani pabilin sa sakayan, dili gayud kamo maluwas."

32Busa giputol sa mga sundalo ang mga pisi sa bote ug gipasagdan kini nga ianud. 33Ug sa hapit na mobanagbanag ang adlaw, si Pablo miagda kanilang tanan sa pagkaon, nga nag-ingon, "Karon mao na ang ikanapulog-upat ka adlaw sa inyong pagpinaabut ug sa pagpuasa, sanglit wala man kamoy nakaon nga bisan unsa. 34Busa agdahon ko kamo sa pagkaon; kini makahatag kaninyog kabaskog, kay walay bisan usa ka lugas buhok nga mawagtang gikan sa ulo ni bisan kinsa kaninyo."

35Ug sa nakapamulong na siya niini, siya mikuhag tinapay, ug sa nakapasalamat siya sa Dios sa atubangan sa tanan, kini iyang gipikaspikas ug misugod siya sa pag-kaon. 36Ug unya nadasig silang tanan ug sila mikaon usab. 37(Ug kaming tanan duha ka gatus ug kapitoan ug unom ka mga tawo diha sa sakayan.) 38Ug sa nangabusog na sila, ilang gipagaan ang sakayan pinaagi sa paglabog sa mga trigo ngadto sa dagat.

PAGPAAMBIT SA MENSAHE:

Ang maong ebanghelyo nagsukod sa mga tahas ni Pablo diin diha sa maong subasko gipanalanginan siya sa Dios ug ingon man usab ang iyang mga kauban. Kini usa ka pagtulon-an diin sa makausa pa gipasinati sa Dios ang iyang gahum pinaagi sa pagsalig nga gibatunan ni Pablo, silang tanan maluwas, diin nagpamatuod lamang kini sa ebanghelyo nga nagaingon nga kun adunay usa sa matag pamilya nga nagaampo kanako nan luwason ko kamong tanan.

Ang subasko nga nahisgotan maoy subasko sa lainlaing hitabo diha sa tagsa-tagsa nato ka kinabuhi diin kun ato lang kanunay isalig sa Dios diin matod pa kun aduna kay pagtoo sama kadako sa liso sa mostasa nan makahimo ka pagsugo sa bungtod pagbalhin sa dagat ug mobalhin siya.

Apan ang Dios lamang ang makasukod sa atong pagtoo diin bulahan nga sa kanunay ibalaan nimo ang imong kaugalingon ug sa ingon kanunay kitang naga-ampo ug isalig sa Dios ang tanan kay matod pa sa Dios " Bisan sa baba sa kamatayon luwason ko ikaw kun gitugyan mo ang among kinabuhi sa hingpit kanako".

Diin bulahan ang mga katawhan nga sa kanunay nagatugyan sa ilang kinabuhi ug kanunay nga ngasunod sa iyang kabubut-on kay mahatagan ug kinabuhi apan ang katawhan nga nagdumili sa pagtugyan sa iyang kinabuhi basin kawad-an niini.