Pagtuo Ug Mga Buhat

SANTIAGO 2 : 21 ~ 26

21Dili ba si Abraham nga atong ginikanan gipakamatarung man tungod sa binuhatan, sa paghalad niya kang Isaac nga iyang anak diha sa halaran? 22Masabut mo nga ang iyang pagtoo diay naglihok duyog sa iyang binuhatan, ug nga ang iyang pagtoo nahingpit pinaagi sa iyang binuhatan; 23ug sa ingon niana natuman ang kasulatan nga nagaingon, "Si Abraham mitoo sa Dios, ug kini giisip kaniya nga maoy pagkamatarung"; ug siya ginganlan nga higala sa Dios.

24Makita ninyo nga ang tawo pagamatarungon pinaagi sa iyang binuhatan ug dili lamang pinaagi ra sa iyang pagtoo. 25Ug sa ingon usab nga paagi, dili ba si Rahab bisan gani dautang babaye gimatarung man pinaagi sa binuhatan sa iyang pagdawat sa mga maniniid ug sa pagpagula kanila sa laing agianan? 26Kay maingon nga patay ang lawas nga mahimulag sa espiritu, mao man usab patay ang pagtoo nga mahimulag sa binuhatan.

PAGPAAMBIT SA MENSAHE:

Ang maong ebanghelyo nagpasabot sa kalig-on sa atong pagtuo sa Dios pinaagi sa atong mgabuhat kay mag-unsa man ang imong pagtuo kun kini dili nimo ubanan sa buhat. Kay matod pa sa ebanghelyo patay ang pagtuo kun kini walay buhat sama nga patay ang lawas kun kini wala nay espiritu.

Unsaon man nato pagpakita sa Dios sa atong pagtuo pinaagi sa mga buhat? Kini atong mapakita kaniya pinaagi sa mga pag-ampo ug pagsunod sa iynag kabubut-on ug kasugo-an. Mga pag-ampo diha sa dagkong templo . diha sa atong panimalay, ug diha sa atong gitrabaho-an sa inadlaw-adlaw nga gimbuhaton. Importante ang santos nga rosaryo diin mao kini tulay ngadto sa atong pangaliya sa Amahan sa Langit.

Mas maayo diay nga diha sa atong pagpangaplag sa kinabuhi isalig nato sa Dios ang tanan pinaagi sa pagpangaliyupo ug pagpangaliya kaniya aron siya ang magagiya diha sa atong mga paningkamot. Patay usab diay ang imong paningkamot ug pagpangaplag kun kini walay panalangin sa Dios. Kay diha diay sa imong bug-os nga pagtuo ug pagsunod sa iyang kabubut-on sa Dios ug sa pagtuman sa mga pag-ampo ug pangaliya magsumikad ang pagtabang ug pagpanalangin kanato sa Dios diha sa atong mga pangandoy ug tingusbawan.

Apan ginaingon usab diha sa ubang bahin sa balaang kasulatan nga bulahan ka igsoon nga nagatoo ka sa butang nga dili makita ug mahikap kay mao kini mga butang nga walay pagkadugta. Diin kinahanglan gayud diay nga atong ipakita sa Dios Amahan ang maong mga pagtuo ngadto kanila pinaagi sa pagbuhat ug maayo ug ilabi na ang pag-ampo kanunay, adlaw ug gabii aron sa ingon kanunay kitang makadawat sa panalangin. Diin nagaingon ang balaan kasulatan nga bisan sa baba sa kamatayun luwason ko ikaw kun sa hingpit imong gitugyan ang imong kaugalingon kanako.

Diin nagaingon usab ang Dios diha sa iyang mga mensahe : Bulahan ang mga katawhan nga nagasunod kanako ug nagatugyan sa iyang kaugalingon sa hingpit kanako kay mahatagan ko ug hataas nga kinabuhi apan ang katawhan nga nagsunod kanako apan nagdumili sa pagtugyan sa iyang kinabuhi sa hingpit ngari kanako basin kawad-an niini. Nga sa ato pa mga igsoon bulahan ang nagsunod sa kasugo-an sa Dios bisan kun nagkahulogan kini sa imong hinulaman nga kinabuhi ug diin bulahan ka nga nakaambit usab sa mga kasakitan ni Jesus diha sa paglansang kaniya sa krus kay makaambit usab sa iyang himaya didto sa langit.