Dugang Mga Paglutos

BUHAT 12 : 1 ~ 15

1 Ug sa maong panahon, si Herodes nga hari mibakyaw sa iyang mga kamot aron sa pagdagmal sa pipila ka mga sakop sa iglesia. 2Ug pinaagi sa espada iyang gipatay si Santiago nga igsoon ni Juan. 3Ug sa iyang pagtan-aw nga kini nakapahimuot diay sa mga Judio, iyang gipadakop si Pedro usab. Ug nahitabo kadto sa mga adlaw sa Tinapay nga Walay Igpapatubo. 4Ug sa iya nang hingdakpan si Pedro, iyang gibanlud siya sa bilanggoan, ug iyang gitugyan aron bantayan siya sa upat ka bantay sa tinagup-at ka mga sundalo, sa tuyo nga inigkaliwas sa Pasko iyang paatubangon siya sa katawhan.

5 Busa si Pedro gibantayan sulod sa bilanggoan. Apan alang kaniya gihimo sa iglesia ang mainit nga pag-ampo ngadto sa Dios. 6Ug sa maong gabii sa wala pa ang sunod nga adlaw sa pagpakuha unta kaniya ni Herodes, si Pedro nga gigapos ug duha ka talikala nagkatulog taliwala sa duha ka sundalo; ug sa atbang sa pultahan dihay mga bantay nga nanagbantay sa bilanggoan. 7Ug tan-awa, mitungha ang usa ka manolunda sa Ginoo, ug misidlak ang usa ka kahayag sulod sa bilanggoan; ug si Pedro iyang gidagpi sa kilid ug iyang gipukaw nga nag-ingon, "Bumangon ka sa madali." Ug ang mga talikala natangtang gikan sa mga kamot ni Pedro.

8Ug ang manolunda miingon kaniya, "Pagsinina ug isul-ob ang imong mga sapin." Ug iyang gibuhat kini. Ug siya miingon kaniya, "Pagkupo ug sumunod ka kanako." 9Ug si Pedro migula ug minunot kaniya; ug wala siya makaila nga tinuod kadtong gibuhat sa manolunda, apan maoy iyang hunahuna nga siya nakakitag usa ka panan-awon. 10Ug sa paghilabay na nila sa nahauna ug ikaduhang bantay, nahiabut sila sa pultahang puthaw nga agianan padulong sa siyudad. Ug kanila kining pultahana naablig iyaiya ra, ug sila nanggula ug mipadayon paglakaw agi sa usa ka dalan; ug unya sa kalit ang manolunda mipahawa kaniya.

11Ug sa nahaulian na si Pedro, siya miingon, "Karon naila ko na sa pagkatinuod nga ang Ginoo nagpadala sa iyang manolunda ug nagpahigawas kanako gikan sa kamot ni Herodes ug gikan sa tanang gipaabut unta sa katilingban sa mga Judio." 12Ug sa nasabtan na niya kini, siya miadto sa balay ni Maria, ang inahan ni Juan nga ginganlan usab ug Marcos, diin didtoy daghang nagkatigum ug nanag-ampo. 13Ug sa pagtuktok niya sa pultahan sa gawas, usa ka dalagitang binatonan nga ginganlan si Rode miadto aron sa pagtubag. 14Ug sa naila niya ang tingog ni Pedro, sa iyang kalipay wala niya maablihi ang pultahan, kondili midalagan hinoon siya sa sulod ug iyang gitaho nga si Pedro didto sa pultahan nagtindog. 15Apan sila miingon kaniya, "Nagsalimoang ka." Apan iya gayud nga gilabanan nga didto gayud siya. Ug sila nanag-ingon, "Iya kadtong manolunda!"

PAGPAAMBIT SA MENSAHE:


Ang maong ebanghelyo nagpamatuod lamang sa gipamulong ni Jesu Cristo samtang nagkinabuhi pa siya dinhi sa kalibutan, miingon siya nga sa higayon nga ato-a na unya siya sa Amahan sa Langit kanunay siyang makig-uban sa iyang mga katawhan nga dili siya makita ug sa kanunay siya magapanalipod kanilang tanan. Diin dili tiaw ang nasinati sa mga sumosunod ni Jesus niadtong panahuna nga diin kanunay nagasunod ang mga pagpanglutos niadtong panahuna, diin sila gihulga kanunay sa kamatayon. Apan tungod sa makanunayong pagpangadye , pag-ampo ug paghalad kanunay nga nanalangin ang Dios kanila.

Daghan ang mga nakabig sa maong mga apostoles diha sa pagtulon-an sa kamatuoran diin matod pa sa balaang kasulatan kun unsa kakusog diha sa imong pagbalaan ug pagpasidungog sa Dios mao usab ang kakusog sa dautan nga mosulsol kanimo. Diin daan nang gisagulan sa politika ang mga pagtulon-an niadtong panahuna diin nahimo nang tawhanon ug matapobre ang ilang ga pagtulon-an nga sa ato pa mga igsoon mas nailhan ka sa mga kapariseohan ug sa mga panggobyerno kun daghan ka ug espo o kwarta.

Diin giisip nila nga sama kanila ug pangutok ang Dios Amahan nga sa kanunay magpasidungog sa Dios pinaagi sa mga maayong bisti, daghang materyal nga gasa ug kabuhong sa bahandi. Apan lahi ang kasinati-an ni Jesu Cristo diin maoy giisip nga bahandi ang mga langitnon gasa, ang kalinaw sa huna-huna, buhat ug ug mga balaang pulong.

Ang paglutos nga nasinati sa mga apostoles, maoy pagmatuod lamang sa katuyo-an sa Dios Amahan diin sa kanunay sila gisukod ug gisulayan kun asa kutob ang pag-ila nila sa kabubut-on sa Dios. Kay matod pa unsaon man pag-ila sa matuod ug puro nga bulawan kun dili mo kini sulayan sa kainit sa kalayo, sa ingon, sama sab diay sa bulawan nga puro ang iyang mga katawhan diin sa kanunay makatagamtam sa init sa kalayo. Ang pangutana asa mang dapita sa atong lawas nga mosiga sama sa bulawan kun kita makalatas sa mga pagsulay.

Matod pa sa Dios Amahan “ Wala unta akoy matagaan sa akong gasa kun gitan-aw ko lamang ang iyong pagkatawhanon, apan lagi kay gilantaw ko man ang kabug-os ug katim-os sa inyong kasing-kasing, nan aduna gayud akoy mahatagan sa akong gasa. Nagpasabot igsoon nga ang mosinaw diay diha kanato sama sa bulawan, luyo sa mga pagsulay diin mao ang atong kasing-kasing, diin moihag ang panagway sa Dios Amahan diha sa atong kasing-kasing tungod sa kanunay nga pagsunod sa iyang kabubut-on ug diin nagpasabot kini nga pinatikan ka na sa espirito santo sa Dios ug diin aduna nay giandam ang amahan kanimo didto sa iyang gingharian,

Nagpasabot usab igsoon nga diha sa mga pagsulay sa imong kinabuhi wala ka pasagdi sa amahan diin kanunay siyang nag-ihap kun kapila ka motindog diha sa mga pagkadagma tungod sa mga pagsulay ug kinsa sa kanunay nga pagtuko sa mga paghalad ug pag-ampo mamahimong hagkap ang tanan mga pagsulay kay matod pa ang tanan nga pagsulay sa Dios sebo gayud sa imong kabubut-on nga sa ato pa latas mo gayud kun sa kanunay mosangpit ka kaniya.