Dila

SANTIAGO 3 : 1 ~ 12

1 Mga igsoon ko, ayaw tugoti nga daghan kaninyo mahimong mga magtutudlo, kay kamo sayud, nga labaw pa sa uban, kita nga magapanudlo mahiagum sa labi pa ka mapiuton nga hukom. 2Kay kitang tanan ugod mangasayop man sa daghang paagi, ug kon ugaling aduna may tawo nga dili masayup sa iyang pagpanulti, kana siya hingpit nga pagkatawhana; siya arang makapugong sa iyang tibuok lawas usab. 3Kon tauran tag bokado ang baba sa mga kabayo aron sila mopatoo kanato, mahimo nato ang pagpalisoliso sa ilang tibook lawas. 4Tan-awa usab ang mga sakayan; bisan tuod sila dagku kaayo ug ginapatulin sa makusog nga mga hangin, sila ginapalisoliso sa usa ka gamay nga bansalan ngadto sa bisan diin sumala sa tinguha sa nagapangolin.

5Maingon usab niana, ang dila maoy usa ka gamayng bahin sa lawas, ug ginapanghambog niini ang mga dagkung butang. Pagkadaku sa lasang nga masunog sa usa ka gamayng kalayo! 6Ug ang dila maoy usa ka kalayo. Sa mga bahin sa atong lawas, ang dila maoy usa ka dautan nga kalibutan nga nagahugaw sa tibuok lawas, nagaduslit sa ligid sa kinaiyahan, ug nga sa iyang kaugalingon siya dinuslitan ug kalayo sa infierno. 7Kay mahimo sa pagpaaghop ug ginpaaghop sa tawo ang tanang matang sa mga mananap ug mga langgam, sa mga nagakamang ug sa mga isda.

8Apan walay tawo nga arang makapaaghop sa dila--nga maoy usa ka dautan nga nagahigwaos, puno sa hilo nga makamatay. 9Pinaagi sa dila ginadayeg nato ang Ginoo ug Amahan, ug pinaagi niini ginapanghimaraut nato ang mga tawo nga binuhat ingon sa dagway sa Dios. 10Gikan sa mao rang usa ka baba nagagula ang pagpangdayeg ug pagpanghimaraut. Mga igsoon ko, dili kana matarung. 11Nagasugwak ba sa tubod gikan sa maorang usa ka baba, ang tubig nga matab-ang ug ang tubig nga maparat? 12Mga igsoon ko, makapamunga bag mga olivo ang kahoyng igira, o makapamunga bag mga igos ang punoan sa parras? Dili, maingon nga ang tubod nga maparat dili makahatag ug matab-ang nga tubig.

PAGPAAMBIT SA MENSAHE:

Ang maong ebanghelyo mga igsoon nagpasabot sa mga gasa nga materyal diha sa atong kinabuhi diin sa maog ebanghelyo gipasabot ang mahimo sa dila isip isa ka parte sa atong lawas diin kini siya maoy gigamit nato sa pagdayeg sa Dios diha sa matag adlaw nga pag-ampo ug kini usab ang dila maoy gigamit sa pagpanglibak ug sa pagpangasaba sa atong isigkaingon. Diin nagaingon usab ang maong ebanghelyo nga dili maayong sumbanan nga usa ra ang tuburan sa daotan ug sa maayong pulong.

Usa kini ka pagtulon-an mga igsoon nga diin sa pagkanaog ug pagpakatawo ni Jesus niining kalibutan, libo-an na katuig ang milabay siya nagaingon nga walay dautan nga butang dinhi sa atong kalibutan kay kining tanan ilang gipanalanginan ug nag-agi sa ilang kabubut-on. Ug sa ingon ang tanan tawo dili dautan kay kini nagagikan man sa ilang kabubut-on ug maoy pinalabi sa iyang mga binuhat dinhi sa ibabaw sa kalibutan, ug kun adunay may iya sa dautan kana mao lamang ang iyang binuhatan. Nga sa ato pa mga igsoon kun ipahari diay nato sa atong kaugalingon ang hiyas sa espiritu santo nga maoy gisul-ob ni Jesus sa iyang pagpakabuhi dinhi sa kalibutan nan walay luna ang dautan diha sa atong huna-huna, sa atong pulong ug sa atong mga buhat.

Nga sa ato pa mga igsoon kun ang parti sa imong lawas gigamit sa dautan ug nagamit usab sa maayo, pagtuki igsoon kay wala nimo matukib ang pagtulon-an nga iya ni Jesu Cristo, diin ipahari ang Dios diha sa atong kasing kasing diin ang dautan nga huna-huna ug hiyas dili gayud magdugay diha sa imong kaugalingon. Nga sa ato pa gikinahanglan diay ang kanunay nga paghalad, pagpanagliya ug pag-ampo aron dili kita o ang parte sa atong lawas mamahimong instrumento sa pagbuhat ug dautan ug pagpakasala.