Tuesday, June 10, 2008

Ang Matuod Nga Pagkamataromg

PILIPOS 2 : 1~ 11

1 Dugang pa niini, mga igsoon, pagkalipay kamo diha sa Ginoo. Ang pagsulat kaninyo sa mao ra gihapong mga butanga dili makataka kanako, ug alang kaninyo kini makapalig-on. 2Likayi ninyo ang mga iro, likayi ninyo ang mga magbubuhat ug dautan, likayi ninyo sila nga mga nanagpamutol ug unod. 3Kay kita mao ang tinuod nga mga may sirkunsisyon, kita nga nagasimba sa Dios diha sa espiritu, ug nagapasigarbo kang Cristo Jesus, ug walay pagsalig sa unod.

4 Ngani ako may pasikaranan sa pagsalig sa unod usab. Kon adunay laing tawo nga magadahum nga siya may pasikaranan sa pagsalig sa unod, ako labaw pa: 5gisirkunsisyonan ako sa ikawalong adlaw gikan sa akong pagkahimugso, sa kaliwatan ako ni Israel, sa banay ni Benjamin, Hebreohanon nga natawog mga Hebreohanon; bahin sa kasugoan, Fariseo; 6bahin sa pagkamasibuton, maglulutos sa iglesia; bahin sa pagkamatarung nga pinasikad sa kasugoan, dili masaway. 7Ngani bisan unsang kadaugan nga akong naangkon kaniadto, kini ako nang giisip nga kapildihan tungod kang Cristo. 8Sa pagkatinuod ang tanan akong ginaisip nga kapildihan tungod sa labawng kabililhon sa pagpakaila kang Cristo Jesus nga akong Ginoo. Tungod kaniya napildihan ako sa tanang butang, ug kini sila ginaisip ko ingon nga mga biya na aron lamang maako si Cristo

9 ug makaplagan ako diha kaniya, dili nga nagabaton ako sa pagkamatarung nga akong kaugalingon pinasikad sa kasugoan, kondili nianang pagkamatarung nga pinaagi sa pagtoo kang Cristo, ang pagkamatarung nga gikan sa Dios, nga nagasukad sa pagtoo; 10aron ako makaila kaniya ug sa gahum sa iyang pagkabanhaw ug sa pag-ambit sa iyang mga kasakit, nga mahisama kaniya sa iyang pagkamatay, 11aron nga kon mahimo makab-ot ko ang pagkabanhaw gikan sa mga patay.

PAGPAAMBIT SA MENSAHE:

Ang maong ebanghelyo nagpasabot sa pagkinabuhi diha kang Jesus diin hingpit mo nang talikdan ang karaan mo nga kinabuhi ug maoy ipahari ang giya sa espiritu santo nga maoy pagtulun-an nga gibarugan ni Jesus ug maoy ipasul-ob sa iyang mga katawhan o sumusunod. Diin sa maong ebanghelyo gibatbat ni Pablo nga dili sukarananan ang pagkatinuli diha sa imong bug-os nga pagtoo sa Dios.

Diin unsaon man ang imong pagkatinuli diin wala ka mailhi sa Dios kay wala ka man mosangpit ni motoo kaniya. Ang labing importante diha sa pagbarog mo sa usa ka pagtulon-an diin barugan mo kini pinasikad sa imong kasingkasing kay aron kanunay mo kining amomahon sa mga pag-ampo, Importante ang kanunay nga pag-ampo ug paghalad diin maandam mo nang daan ang imong ispiritu sa pag-abot sa kamatayon.

Sa ato pa igsoon ang buhing timailhan diha sa imong pagtoo makita kini diha sa mga mata sa Dios pinaagi sa imong bug-os ug tim-os nga kasing-kasing. Nan walay pulos ang mga timailhan nga materyal nga imong nahuptan kun ikaw mismo wala mahiusa diha sa imong kasingkasing, diin lahi ang imong gipamulong ug gibuhat ug lahi usab ang sulod sa imong kasing kasing.

No comments:

Holy Spirit of Blessed Mother of Mercy

Easter Greetings Of Holy Spirit of Sr. Santo NiƱo