Pagsulay Ug Pagtintal

Santiago 1 : 12 ~ 18

12Bulahan ang tawo nga moantus sa mga pagsulay kay human siya makaantus sa pagsulay, iyang madawat ang purongpurong nga kinabuhi, nga gisaad sa Dios kanila nga nagahigugma kaniya.

13 Ayaw ipaingon ni bisan kinsa sa diha nga siya pagatintalon, "Ako gitintal sa Dios"; kay ang Dios dili arang matintal ug dautan, ug walay bisan kinsa nga iyang pagatintalon; 14hinonoa ang matag-usa ka tawo matintal sa diha nga madaldal ug mahaylo siya sa iyang kaugalingong pagpangibog. 15Ug ang pagpangibog, sa makapanamkon na, magapahimugsog sala; ug ang sala, inigkagulang na, manganak ug kamatayon. 16Ayaw kamo pagpalimbong, hinigugma kong mga igsoon.

17Ang tanang maayong hatag ug ang tanang hingpit nga gasa nagagikan sa kahitas-an, gikan sa Amahan sa mga kahayag kang kinsa walay pagkausab ni landong gumikan sa pagkabalhin. 18Sa iyang kaugalingong kabubut-on kita iyang gipanganak pinaagi sa pulong sa kamatuoran aron kita mangahimong ingon sa mga pangunahang bunga sa iyang mga binuhat.

PAGPAAMBIT SA MENSAHE:

Ang maong ebanghelyo naghisgot sa pagsulay ug sa mga pagtintal sa tawo diin ang maong mga pagsulay matud pa sa ebanghelyo dili kini iya sa Dios iya kini sa dautan apan gitugotan sa Dios aron pagsuta sa kalig-on sa pagtuo sa iyang katawhan.

Ang pagtintal binuhatan kini sa dautan diin atong mahinumduman sa panahun sa unang mga katawhan nga si Adan ug si Eba diin gigamit sa dautan o sa yawa si Eba aron sa pagtintal ni Adan pinaagi sa pagpakaon niya sa maong mansanas ug maoy hinungdan nga gipalayas sila sa Dios sa paraiso maoy sinugdanan sa sala nga panulondon.

Ang tintal o tintasyon magmadaugon lamang kun ang hintungdan mawili pa sa kalibutan diin molingi pa siya sa mga tawhanong kailibgon. Apan kitang tawo dili kita makapangandak nga lig-on kita diha sa mga pagsuway kay ang tawo huyang sa pagsulay diin labina nga maoy gamiton sa pagsulay kanimo ang mga mahal sa kinabuhi.

Apan kun ang Dios Amahan maoy mohatag ug pagsuway walay tawo dinhi sa ibabaw sa kalibuttan nga mobaarog niini apang diha sa kanunay ug hinayhinay nga pangliyupo ug pag-ampo matod pa ang impossible mahimong posible ug madaug mo ang pagsulay sa imong kinabuhi.