Ang Pag-alagad Sa Dios

ROMA 12 ~ 1 ~ 21

1 Busa hangyoon ko kamo, mga igsoon, tungod sa mga kalooy sa Dios, sa pagtugyan sa inyong mga lawas ingon nga halad nga buhi, balaan ug hinangponon sa Dios, ang halad nga mao ang inyong espirituhanong pagsimba. 2Ayaw kamo pagpahiuyon niining panahona sa kalibutan, kondili usba hinoon ninyo ang inyong kaugalingon pinaagi sa pagbag-o sa inyong salabutan, aron inyong masuta kon unsa ang maayo ug hinangponon ug hingpit nga kabobut-on sa Dios. 3Kay pinaagi sa grasya nga gihatag kanako agdahon ko ang matag-usa kaninyo sa dili paghunahuna ug labaw kay sa angay niyang hunahunaon mahitungod sa iyang kaugalingon, kondili nga maghunahuna hinoon siya uban sa kaligdong, ang matag-usa sibo sa gidak-on sa pagtoo nga gibahin sa Dios kaniya.

4Kay maingon nga diha sa usa ka lawas aduna kitay daghang mga bahin, ug ang tanang mga bahin dili managsamag bulohaton, 5mao man usab kita, bisan daghan, usa ra kita ka lawas diha kang Cristo, ug ang matag-usa kanato isigkabahin, ang usa sa usa. 6Ug sanglit nabatonan ta man ang espirituhanong mga hiyas nga nagkalainlain sibo sa grasya nga gihatag kanato, kinahanglan gamiton ta kini: kon sa profesiya, kinahanglan gamiton ta kini sibo sa gidak-on sa atong pagtoo; 7kon sa pag-alagad, sa atong pagpang-alagad; ang nagatudlo, sa iyang pagpanudlo; 8ang nagamaymay, sa iyang pagpangmaymay; ang nagaamot, sa pagkamanggihatagon; ang nagahatag ug panabang, sa pagkamasibuton; ang nagahimog mga buhat sa kalooy, sa kasaya. 9Kinahanglan walay pagminaut ang gugma. Dumti ninyo ang dautan, gumakos kamo sa maayo.

10Paghigugmaay kamo ang usa sa usa sa gugma nga inigsoon; pagpalabwanay kamo sa pagtahud ang usa sa usa. 11Ayaw kamo pagpakulang sa kasibut, hinonoa magmainiton kamo diha sa Espiritu. Alagara ninyo ang Ginoo. 12Pagkalipay kamo diha sa inyong paglaum, pagpailub kamo sa panahon sa kagul-anan, lumahutay kamo sa pag-ampo. 13Umamot kamo alang sa mga kinahanglanon sa mga balaan, batasana ninyo ang pagkamaabi-abihon. 14Panghinauti ninyo ang mga nagalutos kaninyo; panghinauti ug ayaw ninyo sila pagpanghimarauta. 15Pagkalipay kamo duyog sa mga nagakalipay, panghilak kamo duyog sa mga nagapanghilak. 16Panagkaangay kamo sa inyong panghunahuna, ang usa ngadto sa usa; ayaw kamo pagpahitaas, hinonoa pakigharong kamo sa mga timawa; ayaw ninyo palabihi ang inyong pag-isip sa inyong kaugalingong pagkamakinaadmanon.

17Kinahanglan walay balusan ninyog dautan tungod sa dautan, hinonoa tinguhaa ninyo ang pagkamaligdong diha sa atubangan sa tanang tawo. 18Kon mahimo, sumala sa inyong takus maarangan, kinahanglan makigdinaitay kamo uban sa tanang tawo. 19Mga hinigugma, ayaw ninyo himoa ang panimalus, hinonoa hatagi ninyog higayon ang kapungot sa Dios; kay nahisulat man kini nga nagaingon, "Akoa ang panimalus, ako mao ang magabayad, nagaingon ang Ginoo." 20Hinonoa, "kon gutomon ang imong kaaway, pakan-a siya; kon uhawon, paimna siya; kay sa imong pagbuhat niini magapundok ikaw ug mga baga diha sa ibabaw sa iyang ulo." 21Ayaw pagpadaug sa dautan, hinonoa dag-a ang dautan pinaagi sa maayo.

PAGPAAMBIT SA MENSAHE:

Ang maong ebanghelyo nagpasabot sa mga hiyas nag batunan sa usa ka sumosunod sa kristuhanong pagtulon-an diin isul-ob nato ang hiyas nga kristuhanon ug maoy atong ipahari diha sa atong kaugalingon nga pagkinabuhi diin bulahan nga aw sama ka na sa langyaw niining kalibutana diin dili ka na molingi sa mga tawhanon nga kailibgon diin isentro nato ang Dios diha sa atong kinabuhi.

Mao kini ang pagtulon-an nga gitisok ni Jesus nagdto as iyang mga apostoles ug mao usab kini nga mga pagtulon-an nga gisangyaw sa maong mga apostoles ngadto sa mga katawhan. Apan samtang nagkinabuhi pa ang tawo dili gayud kalikayan ang pagpakasala diha sa atong mga pulong, mga huna-huna ug sa buhat.

Gikinahanglan gayud nga as kanunay mangayo kita ug pasaylo diha sa atong mga kasal-anan sa adlaw nga tanan aron sa ingon mahinlo-an kanunay ang atong kaugalingon, kay matod pa sa pulong sa Dios, walay pagtulon-an o relihiyon nga makaluwas diha sa mga katawhan, diin ikaw gayudmismo nga tagtungod maoy manubag sa Dios Amahan inig-abot sa Adlaw sa panudya, nga sa ato pa imong obligasyon ang pagbalaan sa imong kaugalingon aron dili ka dag-aon sa Dautan diin mas bulahan nga ikaw maoy modaug diha sa mga dautan sama sa mga paglutos ug pag-biay-biay.