Mga Pahimangno Ug Pasidaan

HEBREO 12 : 12 ~ 29

12Busa iisa ang inyong nahoyhoy nga mga kamot ug lig-ona ang inyong mahuyang nga mga tuhod, 13ug himoang matul-id ang pagaagian sa inyong mga tiil, aron ang mga bakol dili malisa kondili mamaayo hinoon sila. 14Panglimbasugi ang pagpakigdinaitay uban sa tanang tawo, ug ang pagkabinalaan nga kon wala kini walay bisan kinsa nga makakita sa Ginoo. 15Tan-awa ninyo nga walay bisan kinsa nga mapakyas sa pagkab-ot sa grasya sa Dios; nga walay "gamut sa kapaitan" nga mogitib ug magahimog kasamok ug tungod niini ang daghan mahitakdan sa kahugaw; 16nga walay bisan kinsa nga magmakihilawason o magmadili espirituhanon ingon kang Esau, kinsang katungod sa pagkapanganay iyang gipabayloan ug usa ka pagkaon. 17Kay kamo nasayud nga sa kapulihay, sa gitinguha na niya ang pagpanunod sa panalangin, siya gisalikway; kay siya wala na makakaplag ug higayon sa paghinulsol bisan pa nga gipangita unta niya kini nga inubanan sa paghilak.

18 Kay kamo wala managpakaduol sa butang nga sarang matukbil, sa nagasilaob nga kalayo, ug sa kangitngit, ug sa kangiob, ug sa bagyo, 19ug sa huyop sa trompeta, ug sa tingog kinsang mga pulong nakapaagda sa mga nanagpatalinghug sa pagpangamuyo nga unta dili na sila sultihan pa ug dugang mga pulong. 20Kay sila dili makaantus sa sugo nga gihatag nga nag-ingon, "Kon bisan pa gani ang usa ka mananap makatukbil sa bukid, kini kinahanglan pagabatoon hangtud mamatay." 21Sa pagkatinuod, hilabihan ka makalilisang sa talan-awon nga tungod niana si Moises nakaingon, "Ako nagakurog sa kalisang." 22Apan kamo nanagpakaduol na ngadto sa bukid sa Sion ug sa lungsod sa Dios nga buhi, sa langitnon nga Jerusalem, ug sa dili maisip nga mga manulonda nga nanagtigum sa pagsadya,

23ug sa katilingban sa mga panganay kinsang mga ngalan nahisulat sa talaan didto sa langit, ug sa usa ka maghuhukom nga mao ang Dios sa tanan, ug ngadto sa mga espiritu sa mga tawong matarung nga nangahimong hingpit, 24ug kang Jesus, ang tigpataliwala sa usa ka bag-ong pakigsaad, ug sa sinablig nga dugo nga nagasulti sa labi pa ka maayong pulong kay sa dugo ni Abel. 25Tan-awa nga dili ninyo igasalikway siya nga mao ang nagasulti. Kay kon wala man gani sila managpakaikyas nga misalikway kaniya nga nagpahamatngon kanila dinhi sa yuta, labi pang dili kita makaikyas kon kita magasalikway kaniya nga nagapahamatngon kanato gikan sa langit.

26Ang iyang tingog kaniadto mitay-og sa yuta; apan karon ang iyang saad nagaingon, "Sa makausa pa usab pagatay-ogon ko dili lamang ang yuta ra kondili maingon man ang langit." 27Kining sultiha, "Sa makausa pa usab," nagapasabut nga pagakuhaon ang bisan unsa nga matay-og ra, ingon nga mga butang nga binuhat ra, aron kadtong dili matay-og igapabilin. 28Busa magmapasalamaton kita tungod sa atong pagpakadawat ug gingharian nga dili matarug ug tungod niana ihalad ta ngadto sa Dios ang makapahimuot nga pagsimba, nga inubanan sa pagtahud ug pagkahadlok; 29kay ang atong Dios maoy usa ka kalayo nga nagaut-ut.

PAGPAAMBIT SA MENSAHE:

Ang maong ebanghelyo naghisgot sa mga pasidaan sa Dios diin nahimong pagtulon-an niadtong unang mga nasilotan na diha sa mga kasuko sa Dios Amahan, ug niining paghi-abot sa Dios nga anak diin nagasangyaw ug nagapasidungog sa Dios Amahan,

Apan ang Dios lahi-lahi ang iyang pagtawag kanato nga iyang mga sumosunod diin bisan diha sa pagpaila sa iyang mga sumosunod sa iyang bugtong anak nagsumikad kini sa paagi nga dili ordinaryo diin iyang gipasidunggan ang iyang anak ug gipaila isip pinakaubos nga ordinaryo nga tawo.

Nga sa ato pa tulukibon ang maong pamaagi sa Dios diin iyang gitipon ang iyang anak ngadto sa mga tinamay, ug mga sinalikway nga mga katawhan, diin nagpamatuod lamang kini sa iyang pulong sa balaang kasulatan nga ang nagpakaubos dinhi sa yuta, ipataas niya sa iyang ginghari-an, apan ang nagpasigarbo sa ilang kaugalingon dinhi sa yuta nan ipaubos ug dili niya ilhon didto sa iyang gingharian.

Nga sa ato pa mga igsoon, ato gayud nga pasidunggan ug ituboy si Jesus diha a atong kaugalingon nga panimalay ug ingon man ang pagpahari kaniya diha sa atong tagsa-tagsa ka kasing-kasing aron magaagi gayud sa iyang kabubut-on ang atong mga kahimo-an dinhi sa yuta. Diin bulahan kun sa kanunay kita makabalaan ug makaampo diha sa santo nga rosaryo matag-adlaw ug gabii diin diha sa mga paglutos ug pagsulay sa atong kinabuhi kanunay kining matukohan sa mga pag-ampo ug diin hagkap na kini nga dad-on.