Gitagna Ni Jesus Nga Budhi-an Siya

JUAN 13: 21~29

21Ug sa nakasulti na si Jesus niini, siya naguol diha sa espiritu, ug nagpanghimatuod siya nga nag-ingon, "Sa pagkatinuod, sa pagkatinuod, magaingon ako kaninyo, nga usa kaninyo magabudhi kanako." 22Ug ang mga tinun-an nagtinan-away ang usa sa usa, nga walay katinoan kon kinsay iyang gipahinungdan niini. 23Usa sa iyang mga tinun-an, siya nga hinigugma ni Jesus, nagpauraray sa dughan ni Jesus.

24Ug si Simon Pedro misinyas kaniya ug miingon kaniya, "Tug-ani ta kinsay iyang gipahinungdan." 25Busa sa nagpauraray siya sa dughan ni Jesus, siya nangutana kaniya, "Ginoo, kinsa man?" 26Ug si Jesus mitubag, "Siya mao kadtong pagatunolan ko niining pan tapus ikatuslob ko kini sa panaksan." Ug sa gikatuslob na niya ang pan, kini iyang gitunol kang Judas nga anak ni Simon Iscariote.

27Sa pagkadawat ni Judas sa pan, siya gisudlan ni Satanas. Ug si Jesus miingon kaniya, "Ang imong pagabuhaton, buhata sa madali." 28Sa mga nanambong sa kan-anan walay bisan usa nga nahibalo nganong iyang gisulti kini kaniya. 29Dihay nanaghunahuna nga tungod kay si Judas mao man ang magtitipig sa panudlanan sa kuwarta, si Jesus nag-ingon kaniya, "Pagpalit sa atong kinahanglanon alang sa fiesta"; o, nga pahatagan kaniya ang mga kabus.

PAGPAAMBIT SA MENSAHE:

Ang maong ebanghelyo naghisgot sa mga panagna ni Jesus diin iya nang gipasidaan nga siya pagabudhi-an sa iyang sumosunod nga si Judas Escariote. Diin kini nalatid nang daan bisan sa wala pa mahiabot si Jesu Cristo dinhi sa kalibutan, nga sa ato pa mga plano ug mga pamaagi sa Dios Amahan siya lamang ang nasayod diin si Jesus nga iyang sumosunod ug bugtong anak igo lang sa pagsunod niini.

Wala gayuy mahimo ang tawo kun kini kabubut-on sa Dios Amahan diin bisan gani ang iyang bugtong anak nga si Jesus nakasinati sa maong pagsulay diin siya maoy gitahasan sa Amahan sa pagluwas sa mga makasasala nga katawhan gikan sa silot sa Dios. Nga sa ato pa mga igsoon atong mapalandungan nga ang dautan adunay kagahum sa pagsamok diha sa mga sumosunod ni Jesus pinasikad usab sa kabubut-on sa Amahan , kay kini aron sa pagsuta sa mga pagtulon-an nga hikat-unan sa iyang mga katawhan diin usa lang kini ka paagi sa pagsukod sa Dios.

Usa kini ka pagtulon-an diha sa balaang kasulatan nga nagaingon kun unsa kakusog sa espiritu santo sa Dios nga anaa kanimo nan makusog usab ang dautan nga mohasi kanimo, diin walay laing taming o sagang kundili ang mga pag-ampo nga iya sa espiritu santo sa Dios, ingon man ang inadlaw-adlaw nga paghalad ug pag-ampo sa santos nga rosaryo. Diin bulahan inig-abot sa maong pagulay hagkap na kay natukhan man kini diha sa mga paghalad ug mga pag-ampo.