Si Jesus Atubangan Ni Annas

JUAN 18: 12~14

12Ug si Jesus gidakop sa panon sa mga sundalo ug sa ilang kapitan ug sa mga polis sa mga Judio, ug ilang gigapos siya. 13 Ug ila unang gidala siya ngadto kang Anas, kay kini siya mao man ang ugangan ni Caifas nga mao ang labawng sacerdote niadtong tuiga. 14Si Caifas mao gani kadto siya ang mihatag ug tambag ngadto sa mga Judio nga maoy maayo nga usa lamang ka tawo ang mamatay alang sa katawhan.

PAGPAAMBIT SA MENSAHE:

Ang maong ebanghelyo nagsaysay sa mga paglutos ni Jesu Cristo sa kanhi-ay diin tukma gayud diha sa nahasulat sa mga panagna sa mga balaang propeta sa unang panahun. Diin nagaingon nga ang anak sa tawo pagasakiton, dagmalan ug ilansang sa krus.

Diha sa istorya sa balaang kasulatan dako ug naambit sila si Annas ug Kaipas sa pagkatuman diha sa panagna sa atong mga propeta diin sila ang mga instrumento diha sa pagpalansang sa Ginoong Jesus diin sila maoy gigamit sa Amahan aron matuman ang nahasulat.

Ang tawo kun anaa sa gahum mahikalimot gayud kini sa tinud-anay niyang tuyo dinhi sa kalibutan, diin tungod sa kadako sa gahum nga iyang nakuptan daw sa nalumos siya niini diin gipakaingon na hinuon niya nga susama siya sa Dios nga walay kinutuban ang gahum . Diin matod pa sa mga tinawhanon nga panaingnan " Nakatungtong lang sa buko-buko sa kabaw gipakaingon na man hinuon niya nga labaw pa siya sa kabaw.

Ingon niana ang maong mga binuhat kaniadto sa panahun ni Jesus diin wala gayud sila magatuo bisan sa huna-huna lamang nga ang ilang gitulisok mao na man diay ang bugtong anak sa Dios, diin gipakaingon lang siguro nila nga ang mga pagsangyaw ni Moises sa kamatuoran niadtong unang panahun sama lang usab kini sa istorya diha sa barberohan ug walay kamatuoran.

Angay diay natong bantayan ug matngonan ang mga ginagmay nga butang ilabina kun anaa na kita sa gahum, diin mahikalimot kita nga kita tawo pa ug nanimuyo lang niining kalibutana, diin aduna pay labaw pa kanato nga atua sa lugar nga wala nato makita ni maabot sa atong huna-huna nga maoy tag-iya kanatong tanan. Mao kini ang pagtulon-an nga gustong ipamata diha sa mga anaa sa gahum, nga kun unsa kataas sa imong pagsaka nan mao usab kakusog ang labunog sa imong pagkahulog ug diin basin wala kanay panahun sa pagbakod ug tabaonan ka na lamang sa yuta.